Biz Azərbaycan xalqının nümayəndələriyik - Danakari

“Udin icması dünəndən Qəbələnin Nic qəsəbəsindəki kilsəmizdə müqəddəs Pasxa bayramını qeyd edir. Həmçinin biz mütəmadi olaraq işğaldan azad edilmiş torpaqlardakı kilsələrə gedərək dualar edirik. Biz 4 dekabr 2020-ci ildən azad olunmuş torpaqlara səfərlərə başlamışıq. İlk əvvəl Kəlbəcərdə Xudavəng monastırında, daha sonra Laçın rayonunda, Suqovuşanda, Talış kəndində və Tuğ kəndindəki monastırlarda şəhidlərimizin ruhuna dualar oxuyub, şamlar yandırmışıq. Eyni zamanda Prezidentimiz və dövlətimiz üçün dualar etmişik”.

Bunu Publika.az-a açıqlamasında Alban-udi xristian icmasının sədr müavini Rafik Danakari deyib.

O söyləyib ki, öz dinləri, ibadətləri ilə bağlı indiyədək maneəyə rast gəlməyiblər: “Sovet dövründən müstəqilliyimizi əldə edənə qədər və həmçinin müstəqilliyimizi əldə etdiyimiz gündən bu günə qədər Azərbaycanda dini etiqadımıza, dini iradəmizə hər hansı fərqli yanaşma hiss etməmişik. Müstəqilliyimiz əldə edildikdən sonra bizim üçün ən xoşagələn hadisələrdən biri də o oldu ki, məktəblərimizdə 4-cü sinfə qədər udi dili tədris edilməyə başlandı. Həmçinin 2006-cı ildə kilsələrimiz əsaslı şəkildə bərpa edildikdən sonra burada öz ana dilimizdə ibadətlərə də başladıq. Bu da bizim üçün çox mühüm bir hadisədir.

İcmamız 180 ildən çox müddət ərzində ermənilərin təzyiqləri altında ibadətlərini erməni dilində keçirirdi. Amma biz artıq ibadətlərimizi öz ana dilimizdə edirik. Bu da təbii ki, Azərbaycanda olan qədim multikulturalizm ənənələri sayəsindədir. Biz özümüzü Azərbaycanda azsaylı xalqlardan hesab etmirik, biz Azərbaycan xalqının nümayəndələriyik. Qəbələnin Nic qəsəbəsi tolerantlığın bir nümunəsidir. Azərbaycanda fərqli dinə, fərqli millətlərə qarşı ayrıseçkilikdən söhbət gedə bilməz. Bizim qəsəbəyə xaricdən gələn qonaqlara Azərbaycandakı tolerantlıq haqqında danışırıq və onlara bildiririk ki, siz gəlin, bizdən tolerantlıq öyrənin”.