Ukrayna və Türkiyədən YENİ UĞUR: "Bayraktar Akıncı" 11500 metr yüksəkliyi fəth etdi

Ukraynanın “İvchenko-Progress” Dövlət Müəssisəsi tərəfindən hazırlanmış və Türkiyəyə gətirilən AI-450 mühərrikləri “Bayraktar Akıncı” pilotsuz uçuş aparatını (PUA) 11500 metr yüksəkliyə qaldırıb.

Publika.az xəbər verir ki, bu barədə Türkiyə mətbuatı məlumat yayıb.

“Baykar Makina” şirkətinin mətbiat xidmətinin press-relizində, PUA-nın 25 saat 46 dəqiqə havada olduğu və Türkiyə aviasiya tarixinin hündürlük rekordunu qırdığı bildirilir. Eyni zamanda, PUA bu müddət ərzində faktiki olaraq 7507 kilometr uçub.

Qeyd edilir ki, ilk dəfədir ki, milli aviasiya vasitəsi bu hündürlüyə qalxıb.

Xatırladaq ki, “Bayraktar Akıncı” PUA, daxili yükü 450 kq və xarici yükü 900 kq olmaqla, 1350 kq ümumi yükdaşıma qabiliyyətinə malikdir. Hər biri 450 at gücündə (340 kVt) iki turbovintli mühərriklə işləyən PUA-nın maksimal havaya qalxma kütləsi 5.5 tondur. 20 m qanad açıqlığı ilə, hər biri 200 at (150 kVt) və ya 750 at (560 kVt) gücünə malik daha iki mühərriklə konfiqurasiya ediləcək şəkildə layihələndirilib.

Hüseyn