Rusiyanın nəhəng şirkəti Avropadakı biznesini 1 avroya satdı

Rusiyanın "Segezha" holdinqi kağız qablaşdırma istehsalı üzrə Avropa biznesini 1 avroya satmaq üçün müqavilə bağlayıb.

Publika.az xəbər verir ki, bu barədə qrupun prezidenti Mixail Şamolin bildirib.

Bu, 7 fabriki idarə edən “Segezha Packaging”in bölməsidir.

Şamolin qeyd edib ki, sövdələşmə başa çatdıqdan sonra sözügedən şirkətin “Segezha Selüloz” və Kağız Fabrikinə 100 milyon avro məbləğində borcu var. Və bu borcu biznesin alıcıları öz üzərinə götürüb.

Şamolinin sözlərinə görə, müəssisəni “işlək vəziyyətdə” saxlamaq üçün onu satmaq yeganə yoldur.

Rusiya ağac məhsullarının tədarükünə embarqo tətbiq edildikdən sonra "Segezha Packaging" zavodları xammal qəbulunu dayandırmağa məcbur olub. Rusiyadan gələn tədarükləri avropalı təchizatçıların materialları ilə əvəz etmək mümkün olmayıb. Onlar Rusiya qrupu ilə əlaqəsi olduğuna görə, şirkətlə əməkdaşlıqdan imtina ediblər.

Qeyd edək ki, “Segezha Group” Almaniya, İtaliya, Hollandiya, Danimarka, Türkiyə, Çexiya və Rumıniyada fabriklərə sahib idi. Onlar birlikdə ildə 700 milyon kağız torba istehsal edirdilər.

Ayşən