Ter-Petrosyanın işığını söndürdülər, suyunu kəsdilər - Qəzəbləndi

Ermənistanın ilk prezidentinin ofisi ölkə hakimiyyətini Ter-Petrosyanın evinə və ofisinə elektrik enerjisini qəsdən kəsməkdə ittiham edib.

Publika.az xəbər verir ki, məsələ ilə bağlı Ter-Petrosyanın ofisi bəyanat yayıb:

“Bu il martın 15-i, saat 13:00-a olan məlumata görə, Ermənistan Respublikasının ilk prezidenti Levon Ter-Petrosyanın şəxsi evi və ofisi elektriksiz qalıb. Təbii ki, su təchizatı da kəsilib. ESA prezidentin mühafizəçilərinin onlarla zənginə cavab verib: "Bir saata onu yenidən işə salacağıq". Bir neçə on saat keçib, amma heç nə dəyişməyib.

Bu arada, şəxsi evin ətrafındakı demək olar ki, bütün evlər və binalarda elektrik var. Sabiq prezidentə qarşı tətbiq edilən və davam edən bu qeyri-insani davranış nə deməkdir? Yalnız bir şey: elektrik kəsilməsi mütləq hakimiyyətin ən yüksək eşelonlarından biri tərəfindən əmr edilib.

ESA əmr olmadan belə bir alçaq hərəkətə əl atmağa cəsarət etməzdi. Qeyd etmək lazımdır ki, prezidentin şəxsi iqamətgahına və ofisinə elektrik və su təchizatı hələ də bərpa edilməyib.

Bu, adi bir qəza deyil, birinci prezidentə və onun ailəsinə qarşı yönəlmiş davam edən sadizmin ifadəsidir”.

Tural