Koronavirusun sürətli inkişafı barədə XƏBƏRDARLIQ: “Həkimlər buna hazır deyil”

Rusiya Federasiyası Prezidenti Administrasiyasının yoluxucu xəstəliklər üzrə mütəxəssisi, Mərkəzi Klinik Xəstəxananın yoluxucu xəstəliklər mərkəzinin müdiri Qeorgi Sapronov bildirib ki, yüngül koronavirus xəstəliyi gözlənilmədən ağırlaşa bilər.

Publika.az xəbər verir ki, bu barədə “RİA Novosti” məlumat yayıb.

Həkim qeyd edib ki, səhər xəstə özünü normal hiss edə bilər, ancaq axşam səhhəti qəfil pisləşdiyi üçün onu reanimasiyaya yerləşdirə bilərik. Sapronov əlavə edib ki, əksər həkimlər xəstəliyin bu qədər sürətli olmasına hazır deyil, buna görə də xəstələrə nəzarət indi xüsusilə vacibdir.

Daha əvvəl mütəxəssislər bildirmişdi ki, koronavirusun müxtəlif orqan və toxumalara yoluxma qabiliyyəti var, bu da virusun yaratdığı xəstəliyi unikal edir. Hamısı SARS kimi başlayır, bundan sonra virus ağciyərlərə keçir, tənəffüs çatışmazlığına səbəb olur. Bununla birlikdə, patogen böyük arteriyalara təsir göstərir ki, bu da tromboza, infarkt və insulta səbəb olur.

Mayın 13-də isə Amerika alimləri COVID-19-un ən çox yayılmış simptomunun iybilmə duyğusunun itirilməsi olduğunu açıqlamışdı. Mütəxəssislər, virusun hissəciklərinin bədənə daxil olduğu zülalların burun boşluğunun hüceyrələri tərəfindən ifraz edildiyini təsbit ediblər.

Aytən Məftun