Daha bir şirkət uşaqlar üzərində peyvənd sınaqlarına başladı

ABŞ-ın əczaçılıq şirkəti “Johnson and Johnson” (J&J) yeni koronavirus peyvənd tədqiqatlarına 12-17 yaş qrupunu əlavə etdiyini açıqlayıb.

Publika.az xarici mətbuata istinadən xəbər verir ki, şirkət peyvəndləri əvvəlcə 16-17 yaş qrupundan olan könüllülər üzərində sınaqdan keçirəcək, daha sonra araşdırmaya 12 yaşlı uşaqlar cəlb olunacaq.

“Gündəlik həyata qayıtmaq üçün virusun yayılmasının qarşısını almaq vacibdir. COVID-19 yeniyetmələrdə ağırlaşmalara səbəb olur, beynin inkişafına, hətta sosial həyata da dərindən təsir edir. Odur ki, bu mübarizədə hər yaş qrupu üçün vaksin inkişaf etdirilməlidir” , - şirkət açıqlamasında bildirib.

Xatırladaq ki, “Moderna”da bu yaxınlarda 6-11 yaşlı uşaqlar üçün COVID-19 peyvəndlərinin tədqiqatlarına başladığını elan etmişdi. ABŞ Səhiyyə Departamentinin Milli Allergiya və Yoluxucu Xəstəliklər İnstitutu ilə birgə aparılan bir araşdırmasında birinci mərhələ klinik sınaqların başladığı, 2-ci və 3-cü mərhələlərin birləşdiriləcəyi və 6750 uşaq üzərində sınaqların aparılacağı qeyd edilib.

Mart-ın 25-də isə ABŞ əczaçılıq şirkəti “Pfizer”, eləcə də Almaniyanın “BioNTech” şirkəti 6 aydan 11 yaşa qədər olan uşaqlarda COVID-19 peyvənd sınaqlarına başladığını bildirmişdi.

Aytən Məftun