HƏYƏCAN SİQNALI: Ölüm sayında artım qapanma təhlükəsini yenidən gündəmə gətirə bilər

Delta ştammı çox sürətlə yayılır, qonşu ölkələrdə yoluxma və ölüm sayında artım qapanma təhlükəsini yenidən gündəmə gətirib. Problemdən tək çıxış yolu peyvəndlənmədir.

Publika.az xəbər verir ki, bu sözləri terapevt Yaqut Abdullayeva deyib. Həkim bildirib ki, Azərbaycanda vaksinasiya yüksək səviyyədə həyata keçirilir:

“Lakin cəmiyyətdə kütləvi immunitet hələ əldə olunmayıb. Odur ki, insanları vaksin vurdurmağa dəvət edirəm. Artıq neçə aydır ki, bütün dünyada vaksinlənmə həyata keçirilir. Araşdırmalar göstərir ki, vaksindən qorxmağa ehtiyac yoxdur. Onun heç bir ciddi əks göstərişi yoxdur. Əksinə elə bu vaksinləşmə sayəsində ölkədə bir çox sahələrdə yumşaldılmaya gedildi.

Sıxlıq olan yerlərdən uzaq durmalı, ictimai yerlərdə isə maska taxmalıyıq. Eyni zamanda qidalanmaya diqqət etməyə dəyər. Vaksin xəstəliyin yüngül keçməsinə, ağırlaşmaların qarşısını almağa kömək edir. Artıq əksəriyyətdə koronavirusa qarşı immunitet əmələ gəlib, antitellər yaranıb. Vaksindən sonra ciddi narahatçılıq keçirən xəstəyə rast gəlinməyib. Ümid edirik ki, yoluxma sayını nəzarətdə saxlamaq mümkün olacaq. Ancaq istənilən halda özümüzü qorumağın əsas yolu vaksindən keçir”.

Aytən Məftun