Həkim hormonal dərmanların bədənə təsirini açdı

Uşaq Endokrinoloqu Dr. Nabat Ağayeva-Əlibəyova bildirib ki, hormonal disbalans orqanizmin vacib funksiyalarını itirməsinə səbəb olur.

Publika.az xəbər verir ki, hormonların sağlamlığımızdakı rolundan danışan mütəxəssisin sözlərinə görə, onlar vəzilərdən ifraz olunurlar və olduqca vacib funksiyaları var.

"İnsulin, adrenalin, böyümə hormonu və s. - hormonlara aiddir. Bəzi xəstəliklər zamanı vəzilər işləmir və hormon ifrazı dayanır, orqanizm vacib funksiyalarını itirmiş olur. Məsələn: mədəaltı vəz işləməyəndə, insulin ifraz olmur, şəkər xəstəliyi yaranır. Hipofiz işləməyəndə, boy hormonu ifraz olmur, boy balaca qalır. Belə olanda, çatışmayan hormonları müalicə şəklində qəbul etməliyik ki, çatışmazlığı aradan qaldıraq.

Bəzən isə orqanizmdə hormon normal miqdarda olsa da, bioloji aktivlikləri olmadığı üçün hormonal müalicə verilir.

Bəzi xəstəliklərdə isə hormonal müalicə yeganə müalicə üsulu olur. Əvvəlkilərdən fərqli olaraq, müasir dərmanlardakı hormonlar insan hormonlarına bənzər şəkildə hazırlanır, ona görə də düzgün diaqnozla, düzgün dozada istifadə olunduqda, fəsad vermir".

Aytən Məftun