Qaydalara əməl olunmasa, koronavirusun ikinci dalğası gələ bilər - Deputat

“Vətəndaşlar karantin rejiminin yumşaldılmasını təhlükənin tam yoxa çıxması kimi başa düşməməlidir”.

Bu barədə Publika.az-a Milli Məclisin deputatı Sədaqət Vəliyeva deyib.

Deputat qeyd edib ki, yumşalma addımlarından sonra gündəlik həyatda böyük hərəkətlilik yarandı: “Bu, iş yerlərinin açılması, sosial-iqtisadi münasibətlərin qismən canlanması baxımından yaxşı olsa da, epidemiyanın daha kütləvi şəkildə yayılmasına səbəb ola bilər”.

Deputat ikinci dalğa təhlükəsinin mövcud olduğuna diqqət çəkib.

“Bəzi məhdudiyyətlərin aradan qaldırılması ikinci dalğanın yaşanması təhlükəsini artırır. İnsanlar bilməlidir ki, koronavirus xəstəliyi uzunmüddətli prosesdir. Bu səbəbdən mövcud qaydalara riayət olunması və zəruri profilaktik tədbirlərin davam etdirilməsi vacibdir. Vətəndaşlar öz sağlamlığını qorumaq üçün sosial məsafə saxlamağa davam etməli, şəxsi gigiyenaya əməl etməlidir. Pandemiyaya qalib gəlməyin yeganə yolu həmrəy olmaq və qoyulan qaydalara əməl etməkdir”, - S.Vəliyeva qeyd edib.