Barselonada 112 illik istilik rekordu yeniləndi

Barselonada termometrin göstəricisi rekord həddə – 40,7°C-yə çatıb.

Publika.az xəbər verir ki, bu barədə "The Guardian" nəşri məlumat yayıb.

Sözügedən göstərici ötən gün qeydə alınıb və bu, İspaniya şəhərində son 112 il ərzində rekord olub.

Qeyd olunub ki, qonşu Fransada da fövqəladə istilər hakim kəsilib. Fransanın daxili işlər naziri Loran Nunyes 300-dən çox meşə yanğını barədə məlumat verib.

İyulun 9-da İspaniyanın cənubundakı Andalusiya muxtar icmasında bir rusiyalı qadının istilik vurması nəticəsində vəfat etdiyi bildirilmişdi. Bu hadisə ekstremal istilər dalğası başlayandan bəri muxtar icmada dördüncü ölüm halı olub.

İyulun 1-də gündəlik ölüm monitorinqi sisteminin məlumatları göstərib ki, İspaniyada iyun ayında müşahidə edilən anomal istilər 1 mindən çox insanın ölümünə səbəb ola bilərdi. Bu, 2015-ci ildən bəri belə statistikaya başlanıldığından bəri ölkədə istidən ölüm hallarının ən yüksək ikinci göstəricisidir. Ən çox hadisə (1 min) 2017-ci ildə qeydə alınıb.

Hüseyn İbadlı