Kosmosda müharibə: ABŞ və Çin peyklərinin döyüşü başladı

ABŞ və Çinin kosmosdakı münasibətləri pisləşir. İki ölkənin peykləri arasında orbital toqquşmalar və manevrlər o qədər müntəzəm hala gəlib ki, sənayedə getdikcə daha çox manevr döyüşləri kimi tanınır.

Publika.az xəbər verir ki, bu barədə "The Washington Post" məlumat yayıb.

Hərbi analitiklər qeyd edirlər ki, əksər hallarda bu, kosmik kəşfiyyatı əhatə edir. Peyklər bir-birini müşahidə etmək, düşmən peyklərinin şəklini çəkmək və onların quraşdırılmış avadanlıqlarını və texniki imkanlarını qiymətləndirmək üçün bir-birinə yaxınlaşırlar.

Xatırladaq ki, ən gərgin qarşılaşmalardan biri 2022-ci ilin fevral ayında baş verib. İki Çin eksperimental peyki geostasionar orbit üzərində uçarkən Pentaqon tərəfindən idarə olunan Amerika kosmik gəmisi arxadan onlara yaxınlaşıb.

Buna cavab olaraq Çin peykləri öz düzülüşlərini dəyişdirib. Biri əvvəlki trayektoriyası üzrə davam edib, digəri isə yavaşlayaraq Amerika peykinin arxasına keçib. Bundan sonra rollar faktiki olaraq dəyişdirilib və Amerika tərəfi hərəkətlərini tənzimləmək məcburiyyətində qalıb.

Mütəxəssislər qeyd edir ki, ənənəvi olaraq kosmik gəmilər qarşıdurma və özünümüdafiə üçün nəzərdə tutulmayıb. Lakin indi yanaşmalar yenidən nəzərdən keçirilir və kosmos tədricən daha bir rəqabət zonasına çevrilir.

Qeyd edək ki, ABŞ liderliyini və orbital sistemlərini qorumaq üçün öz texnologiyalarını inkişaf etdirmək niyyətindədir. Pekin isə bildirib ki, Çin kosmosdan dinc məqsədlərlə istifadəni dəstəkləyir və silahlanma yarışı və ya birtərəfli üstünlük axtarmır.

Adəm