Müharibə iki həftəlik dayandırıldı - Trampdan KRİTİK AÇIQLAMA

“Pakistanın Baş naziri Şahbaz Şərif və feldmarşal Asim Munir ilə apardığım söhbətlərə əsaslanaraq və onların bu gecə İrana göndərilən dağıdıcı qüvvəni dayandırmaq barədə xahişlərini nəzərə alaraq, həmçinin İran İslam Respublikasının Hörmüz boğazının TAM, DƏRHAL və TƏHLÜKƏSİZ ŞƏKİLDƏ AÇILMASINA razılıq verməsi şərti ilə, mən İranın bombalanmasını və ona qarşı hücumu iki həftəlik müddətə dayandırmağa razı oluram”.

Publika.az xəbər verir ki, bunu ABŞ Prezidenti Donald Tramp sahibi olduğu “Truth Social” sosial şəbəkəsindəki hesabında yazıb.

”Bu, ikitərəfli ATƏŞKƏS olacaq! Bunu etməyimizin səbəbi odur ki, biz artıq bütün hərbi hədəflərimizə çatmışıq və onları üstələmişik, həmçinin İranla uzunmüddətli SÜLH və Yaxın Şərqdə SÜLH ilə bağlı qəti razılaşmaya doğru çox böyük yol qət etmişik. Biz İrandan 10 bəndlik təklif almışıq və bunun danışıqlar üçün əlverişli əsas olduğuna inanırıq. Keçmişdəki mübahisəli məqamların demək olar ki, hamısı Amerika Birləşmiş Ştatları və İran arasında razılaşdırılıb, lakin iki həftəlik müddət Razılaşmanın yekunlaşdırılmasına və tamamlanmasına imkan verəcək. Amerika Birləşmiş Ştatlarının adından, Prezident kimi və həmçinin Yaxın Şərq ölkələrini təmsil edərək, bu uzunmüddətli problemin həllinə yaxın olmaq bir şərəfdir. Bu məsələyə göstərdiyiniz diqqətə görə təşəkkür edirəm! Prezident DONALD J. TRUMP” - ABŞ lideri bəyan edib.

Hüseyn İbadlı