Avropanı son 60 ilin ən sərt qışı gözləyir - Nazir müavini həyəcan təbili çaldı

Qarşıdan gələn qış bütün Avropa üçün son 60 ilin ən çətin qışı ola bilər.

Publika.az xəbər verir ki, bunu Rumıniyanın Baş nazirinin müavini Kelemen Hunor B1TV kanalının efirində bildirib.

“Rusiyaya qarşı sanksiyaların əvəzini ilk növbədə biz, Avropa İttifaqı ödəyəcəyik. Bu, ağır qış olacaq, ola bilsin son 40-50-60 ilin ən sərt qışı olacaq. Təəssüf ki, bütün Avropa üçün...”

Siyasətçinin sözlərinə görə, ölkə hökuməti Rumıniyanın qaz bazarındakı tələbatının təxminən 80%-ni təmin edə biləcək, bazardan 2 milyard kubmetrə yaxın qazın alınması planlaşdırılır.

O, Ukrayna ərazisindəki münaqişənin hamının düşündüyündən daha uzun sürəcəyini və bunun da Avropa İttifaqına təsir edəcəyini, lakin başqa təsir rıçaqları olmadığından hələ də sanksiyaların tətbiqinə ehtiyac olduğunu vurğulayıb.

Avropaya qaz nəqlinin azalması fevralın 24-dən, Rusiyanın Ukraynaya müdaxiləsindən sonra başlayıb.

Rusiyaya tətbiq edilən sanksiyalar və əks-sanksiyalar Yamal-Avropa qaz kəməri (gücü - ildə 32,9 milyard kubmetr) ilə qaz axınının dayanmasına səbəb olub. Mayın əvvəlindən Ukrayna “Qazprom”un “LXR” və “DXR” ərazisindən tranzitlə bağlı müraciətlərini rədd edir.

Səxavət