Çin gəmisi qəzaya uğradı, 39 nəfər itkin düşdü

Çin prezidenti Si Cinpin Çinin "Lu Penq Yuan Yu 028" balıqçı qayığının qəzaya uğraması nəticəsində itkin düşən balıqçıların axtarışı və xilas edilməsi üçün bütün səylərin görülməsini tələb edib.

Publika.az xəbər verir ki, bu barədə Çin Mərkəzi Televiziyası məlumat yayıb.

Gəmi qəzası Pekin vaxtı ilə səhər saat 3 radələrində Hind okeanının mərkəzi hissəsində baş verib. Gəminin göyərtəsində 39 nəfərdən ibarət ekipaj olub. Onlardan 17-si Çin, 17-si İndoneziya və 5-i Filippin vətəndaşıdır.

Gəmi "Penglai Jinglu Fishery" şirkətinə məxsus olub və Şandunq əyalətinin limanlarından birində yerləşirdi.

Si Cinpin fəlakət bölgəsinə əlavə xilasedici qüvvələrin göndərilməsi və xilasetmə əməliyyatlarının aparılması üçün beynəlxalq dəniz axtarış-xilasetmə yardımının əlaqələndirilməsi barədə göstəriş verib. Cinpin və Çinin Baş naziri Li Qiang xaricdəki Çin diplomatik qurumlarına, eləcə də kənd təsərrüfatı və nəqliyyat nazirliklərinə balıqçıların mümkün sağ qalanlarının axtarışına köməklik göstərməyi tapşırıblar.

Hüseyn İbadlı