Çinlilər dostluq kodunu sındırdılar

Alimlər sübut ediblər ki, insanlar özlərinə bənzər psixi xüsusiyyətlərə malik şəxslərlə dostluq edir və onlara aşiq olurlar.

Publika.az "İzvestiya"ya istinadla xəbər verir ki, çinli mütəxəssislərin apardığı araşdırma "ikiqat empatiya" konsepsiyasını təsdiqləyib.

Eksperiment göstərib ki, beyin sinxronizasiyası ən yaxşı səviyyədə autizm əlamətləri oxşar olan insanlar arasında baş verir. Söhbət klinik diaqnozlardan deyil, bir ucunda ətrafdakılarla tam uyğunlaşma, digər ucunda isə başqalarının varlığına dözə bilməməyin dayandığı bir şkaladan gedir.

Normotip insanlar bu şkalanın ortasında yerləşir və şüuraltı olaraq tərəfdaşlarını öz seqmentlərindən seçirlər. Britaniyalı Damien Miltonun "ikiqat empatiya" nəzəriyyəsinə görə, ünsiyyətdə çətinliklər təkcə autizmli insanda deyil, hər iki tərəfdə yaranır.

Bununla belə, ekspertlər yalnız eyni düşüncəli insanların dairəsinə qapanmamağı, fərqli düşünən insanlarla da əlaqə qurmağı tövsiyə edirlər. Bu, stereotipləri aşmağa və dünyagörüşünü genişləndirməyə kömək edir. Hətta sizi qıcıqlandıran bir tərəfdaşla qarşılıqlı münasibət gözlənilməz dərəcədə dərin əlaqələrə çevrilə bilər.

Hüseyn İbadlı