Polşalı deputatdan çağırış: Ukraynalılar ölkələrinə qaytarılmalıdır

Polşa Seyminin deputatı Yanuş Kovalski Ukrayna vətəndaşlarının məcburi şəkildə ölkələrinə geri göndərilməsini nəzərdə tutan dövlət proqramının həyata keçirilməsinə çağırıb.

Publika.az xəbər verir ki, deputat bu barədə sosial şəbəkə hesabında paylaşım edib.

Onun sözlərinə görə, Polşa artıq ukraynalıların geri qayıtması prosesinə başlamalıdır.

“Ukraynalıların Polşadan Ukraynaya göndərilməsi proqramına başlamağın vaxtıdır. Hamı öz ölkəsinə qayıtmalıdır”, - Kovalski bildirib.

Qeyd olunur ki, deputat bundan əvvəl də Polşanın dövlət qurumlarında nə qədər Ukrayna vətəndaşının çalışdığını müəyyənləşdirmək məqsədilə parlament yoxlamasının başlanmasına təşəbbüs göstərib.

Məlumata görə, son dövrlərdə Varşava ilə Kiyev arasında münasibətlər tarixi məsələlər fonunda gərginləşib. Polşa tərəfi Ukraynada bəzi tarixi fiqurların qəhrəmanlaşdırılmasına etiraz edir və onları İkinci Dünya müharibəsi dövründə minlərlə dinc polyakın qətli ilə əlaqələndirir.

Bununla yanaşı, mənbədə Polşa prezidenti Karol Navrotskinin iyunun 19-da Ukrayna prezidenti Vladimir Zelenskini ölkənin ali mükafatı hesab olunan “Ağ Qartal” ordenindən məhrum etdiyi iddia olunur. Ardınca bir sıra ukraynalı siyasətçilərin də Polşa mükafatlarından imtina etdiyi qeyd edilir.

Adəm