Sudan lideri Rusiya səfərinə hazırlaşır - Nə baş verir?

Sudanın Suveren Şurasının rəhbəri və Silahlı Qüvvələrin ali baş komandanı Abdel Fəttah əl-Burhan bu ilin payızında Rusiyaya rəsmi səfər etməyi planlaşdırır.

Publika.az xəbər verir ki, bu barədə “Baza” "Telegram" kanalı məlumat yayıb.

Bildirilib ki, Rusiya və Sudanın diplomatik qurumları səfərlə bağlı bütün detalları artıq razılaşdırıblar. Yüksək səviyyəli genişmiqyaslı danışıqların oktyabr ayında keçirilməsi nəzərdə tutulur.

Görüşlər zamanı hərbi-texniki əməkdaşlığın dərinləşdirilməsi perspektivləri, eləcə də regional təhlükəsizliyin təmin olunması istiqamətində koordinasiyanın gücləndirilməsi müzakirə ediləcək.

Gündəmdə yer ala biləcək əsas məsələlərdən biri də 2020-ci ildə əldə olunmuş razılaşma əsasında Rusiya Hərbi Dəniz Donanmasının Qırmızı dəniz sahilində maddi-texniki təminat məntəqəsinin yaradılması layihəsinin yenidən aktivləşdirilməsi ola bilər.

Qeyd olunur ki, bu strateji layihənin həyata keçirilməsi indiyədək Sudandakı daxili siyasi qeyri-sabitlik, hərbi çevrilişlər və hakimiyyət dəyişiklikləri səbəbindən davamlı şəkildə təxirə salınıb.

Adəm