“Uçan boşqab” əfsanəsi GERÇƏK OLDU - İki nəfərlik UNO satışa çıxarıldı / VİDEO

Çinin İu şəhərində xarici görünüşcə UNO-nu xatırladan qeyri-adi elektrik uçuş aparatının satışı başlayıb.

Publika.az xəbər verir ki, bu barədə "Sohu" məlumat yayıb.

Bildirilib ki, aparat maksimum iki nəfər üçün nəzərdə tutulub və əsasən qısa məsafəli, alçaq hündürlüklü uçuşlar üçün istifadə ediləcək.

Nəqliyyat vasitəsi diskşəkilli korpusa və şəffaf sferik kabinəyə malikdir. Konstruksiyada karbonplastik və aviasiya alüminiumundan istifadə olunur, pərlər isə qoruyucu kanalların daxilində yerləşdirilib. Maşın uçuş-enmə zolağı olmadan, o cümlədən su üzərində şaquli qalxa və enə bilir.

İstehsalçı avtopilotun olduğunu və aparatın beş bala qədər küləyə davam gətirdiyini bildirir. Maksimum uçuş hündürlüyü təxminən 30 metr, uçuş müddəti isə 15 dəqiqəyədəkdir. Aparatın qiyməti 800 min yuana, yəni təxminən 120 min dollara çatır.

Uçuş aparatı artıq uçuşların həyata keçirilməsi üçün Çinin Mülki Aviasiya İdarəsindən xüsusi icazə alıb. Bununla belə, onun əsasən kiçik hündürlükdə turist marşrutlarında və nümayiş uçuşları zamanı istifadəsi planlaşdırılır. Uzaq məsafəli uçuşlar üçün nəzərdə tutulmayıb.

Elektrik uçuş aparatına maraq yüksək olub: istehsalçı daha əvvəl ümumi məbləği 120 milyon yuandan çox olan sifarişlər alıb. Müştərilərdən biri belə aparatlardan 100-dən çoxunu alıb.

Hüseyn İbadlı