İsrail səfirinin oğlu hücumda ağır yaralandı – Digər oğlu Qəzzada həlak olub

İsrailin ABŞ-dakı səfiri Yexiel Leyterin oğlu Neriah Leyter İordan çayının Qərb sahilində İsrail ordusunun nəzarət-buraxılış məntəqəsinə edilən hücum zamanı ağır yaralanıb.

Publika.az “The Jerusalem Post”a istinadən xəbər verir ki, ABŞ vətəndaşlığı da olan Neriah Leyter İsrail ordusunda ehtiyatda olan hərbi qulluqçu kimi xidmət edir.

Hadisə Modi'in şəhəri yaxınlığındakı nəzarət-buraxılış məntəqəsində baş verib. Məlumata görə, avtomobil məntəqəyə çırpılıb və həmin vaxt orada xidmət aparan Leyter ağır xəsarət alıb. O, ağır vəziyyətdə Qüdsdəki xəstəxanalardan birinə çatdırılıb və hazırda müalicə olunur.

“The Times of Israel”in məlumatına görə, hücumu həyata keçirən şəxs Fələstinin Beyt-Ur ət-Taxta kəndindən olan 29 yaşlı Mahmud Məhəmməd Sliman olub. O, hadisə yerində öldürülüb.

Qeyd edək ki, İsrail səfirinin digər oğlu Moşe Yedidya 2023-cü ildə Qəzza zolağında gedən döyüşlər zamanı həlak olub. Mayor rütbəsində olan Moşe Yedidya İsrail ordusunda bölük komandiri kimi xidmət edib.