Yaponiya 10 milyon robot işə götürəcək - İnsan çatışmazlığına qarşı qeyri-adi plan

Yaponiya hökuməti 2040-cı ilə qədər ölkədə iş yerlərində süni intellektlə təchiz edilmiş 10 milyon robotun fəaliyyət göstərməsini hədəfləyir.

Publika.az xəbər verir ki, məqsəd əhalinin azalması və yaşlanması səbəbindən artan işçi çatışmazlığını kompensasiya etməkdir. Problem xüsusilə səhiyyə və sənaye sahələrində hiss olunur.

BMT-nin hesablamalarına görə, 2040-cı ildə Yaponiyanın əhalisi 112,2 milyon nəfərə düşəcək. Həmin vaxt 65 yaşdan yuxarı şəxslər əhalinin 35,3 faizini təşkil edəcək, median yaş isə 54-ə çatacaq. Bu vəziyyət şirkətləri iş üçün insanları robotla əvəzləməyə vadar edir.

Bunun nümunələrindən biri Zeals şirkətinin hazırladığı D1 humanoid robotudur. 129 santimetr hündürlüyündə olan robot üzləri tanıya, insanlarla ünsiyyət qura və 5 kiloqrama qədər yük qaldıra bilir. D1 artıq Naqoyadakı xəstəxanada sınaqdan keçirilib, burada ziyarətçilərə istiqamət göstərib və masaları təmizləyib.

Robotlar digər sahələrə də daxil olur. Naqano prefekturasındakı Kakuichi şirkəti 2027-ci ilin aprelində Çində istehsal olunan Miyazawa Noah humanoid robotunu işə qəbul etməyi və onu istehsal, satış və digər sahələrdə real tapşırıqlar üzərində öyrətməyi planlaşdırır.

Bununla yanaşı, robotlaşdırmanın riskləri də müzakirə olunur. Şirkətlər robotların insanlara və əmlaka zərər vurması, eləcə də kiberhücumlar zamanı məlumatların sızması ehtimalını nəzərə alırlar. Yaponiya kadr çatışmazlığına qarşı robotlara böyük ümid bəsləsə də, bu texnologiyanın iqtisadi nəticələri və təhlükələri hələ praktiki sınaq mərhələsindədir.

Müəllif: Adəm