Xəzərin suyu buna görə azalır - Nazirlik səbəbləri açıqladı

"Xəzər dənizi ilə bağlı məsələlər nazirliyin prioritet istiqamətlərindən biridir. Biz dənizdə çirklənmə mənbələrini dəfələrlə müəyyən etmişik. Orada monitorinqlər mütəmadi aparılır".

Publika.az xəbər verir ki, bunu Ekologiya və Təbii Sərvətlər Nazirliyinin Su ehtiyatlarının idarə edilməsi şöbəsinin müdiri Mütəllim Əbdülhəsənov "Ekspert saatı"nda deyib.

Şöbə müdiri qeyd edib ki, dənizi qurudan çirkləndirən obyektlər də müəyyən edilib və onlar üzərində ekoloji yoxlamalar aparılır: "Təmizlənmiş tullantı sularının Xəzərə axıdılması hazırda prioritetdir, nəinki onu təmizləmədən dənizə axıtmaq. Bu, bizə dənizdən və qurudan çirklənmə ilə bağlı monitorinq aparmağa və tədbirlər görməyə imkan verəcək".

M.Əbdülhəsənov Xəzər dənizinin suyunun azalmasına səbəb olan amilləri də açıqlayıb. Bildirib ki, bu tendensiya mütəmadi olaraq baş verir: "Neçə yüz illər bundan əvvəl də bu olub, indi də qalxma və azalmalar müşahidə olunur. Bu, Xəzərin xüsusiyyətlərindən biridir. Həm də çaylarda suyun səviyyəsinin azalması müşahidə edilir. Azərbaycanın çaylarında yaxın 20 il ərzində suyun 10-15 faiz azalması qeydə alınıb. Bu, Volqa və Ural çaylarına da aid edilir. Çaylarda suyun səviyyəsinin azalması, tektonik amillər və digər səbəblər Xəzərin suyunun azalmasına gətirib çıxarır. Hazırda bu, kritik vəziyyət deyil. Amma azalma halı baş verir, düşünürük ki, müəyyən dövrdən sonra stabilləşmə olacaq. Hazırda isə narahatedici amil görmürük".

Akqabay