Yakub Jezniçak vətənində "Qarabağ"dan danışdı - FOTOLAR

Premyer Liqada “Sumqayıt”la oyundan sonra çempionluğunu vaxtından əvvəl rəsmiləşdirən “Qarabağ”ın futbolçularından bəziləri mövsüm bitməmiş istirahətə çəkilib.

Publika.az xəbər verir ki, çempionun polşalı mərkəz müdafiəçisi Yakub Jezniçak artıq vətəninə yollanıb.

Ölkəsinin “Przeglad Sportowy” nəşrinə müsahibə verən 32 yaşlı futbolçu Ağdam klubu ilə bağlı tarixi biliklərini və təcrübələrini bölüşüb. O bildirib ki, “Qarabağ” vaxtından əvvəl çempion olub və ən yaxın rəqibini 17 xal üstələyib:

“Qarabağ” Ağdamı təmsil edir. Hazırda orada hərbi vəziyyət mövcud olduğu üçün komanda Bakıda məskunlaşıb və ev oyunlarını burada keçirir. Paytaxtda elə də çox azarkeşimiz yoxdur. Çempion olmaq borcumuz idi və bu, artıq adi hal kimi qəbul olunur. Çempionluğumuzu səfər matçında çətin mübarizədə rəsmiləşdirdik. Bu sevinci heç nə ilə müqayisə etmək olmaz. Bu, yeni bir mədəniyyət və təcrübədir”.

Təcrübəli futbolçu bildirib ki, mövsüm onun üçün uğursuz keçib:

“7 dəfə zədə aldım. Burun və barmağımdan əməliyyat olundum. Dabanımın müalicəsi davam edir. Buna görə də məşqçimiz Qurban Qurbanovdan icazə alıb istirahətə çəkildim”.

Qeyd edək ki, Yakub Jezniçak ötən yay “Qarabağ”a keçməzdən öncə 12 il ölkəsinin “Legiya” klubunda oynayıb.

Jezniçak Bakıya və onun insanlarına olan heyranlığını heç zaman gizlətmir. O, instaqram hesabından paylaşdığı fotolarla bu sevgisini dəfələrlə ifadə edib.

Zümrüd