Braziliya xalqı Pele ilə vidalaşır - FOTO

Xəbər verdiyimiz kimi, braziliyalı futbolçu Pelenin cənazəsi Vila Belmiro stadionuna aparılıb.

Publika.az xarici mediaya istinadən xəbər verir ki, dünya futbol tarixinin ən böyük ulduzlarından olan əfsanəvi futbolçu ilə vida mərasimi başlayıb. Minlərlə insanın iştirak etdiyi vida mərasimindən görüntüləri sosial mediada yayılıb. Stadionda Pele üçün hazırlanmış xüsusi muzey isə ziyarətçilərin marağına səbəb olub.

Qeyd edək ki, mərasim bir gün davam edəcək, bundan sonra Pelenin cəsədi olan tabut şəhərin küçələri ilə, o cümlədən, yüz yaşlı anasının hələ də yaşadığı evin yanından aparılacaq.

Məlumat üçün bildirək ki, FİFA prezidenti Canni İnfantinonun sözlərinə görə, stadionlara Pelenin adının verilməsi üçün bir çox ölkəyə müraciət göndəriləcək.

“Mən onun xatirəsini ehtiramla yad etmək üçün buradayam. Biz əvvəllər beynəlxalq federasiyalarla yerli futbol çempionatlarının hər oyunundan əvvəl onun şərəfinə bir dəqiqəlik sükutla yad edilməsi barədə danışmışıq. Amma biz həm də istəyirik ki, hər bir ölkədə Pelenin adını daşıyan heç olmasa bir stadion olsun. 50, 100 il keçəcək, uşaqlarımız bizdən onun haqqında soruşacaq, bütün bunlar Pelenin xatirəsini uzadar. Bunun olacağına əmin olmalıyıq”, - İnfantino bildirib.

Aytən Məftun