Məşqçiyə qarşı ittiham: 3 qadına təcavüz edib

44 yaşlı fransız triatlon məşqçisi Frederi Leru üç qadına təcavüz etməkdə və işgəncə verməkdə ittiham olunur.

Publika.az xəbər verir ki, bu barədə “A Bola” məlumat yayıb.

İddia edilən qurbanlar arasında onun keçmiş partnyoru və 2021-ci il uzun məsafəli triatlon üzrə dünya vitse-çempionu Manon Jene də daxil olmaqla üç idmançı var.

Hüquq-mühafizə orqanlarına, eləcə də Fransa Triatlon Federasiyasına və Fransa İdman Nazirliyinə şikayət edən də məhz Jene olub.

Leraya qarşı ilk məhkəmə iddiası 2018-ci ildə idmançılardan biri tərəfindən qaldırılmışdı, lakin bu iş rədd edilmişdi.

Fransız məşqçi hazırda işgəncə də daxil olmaqla cinsi təcavüzdə ittiham olunur. Fransa Triatlon Federasiyasının məlumatına görə, Frederi Leru idmançılarına psixoloji təzyiq göstərib, onları alçaldıb və həddini aşaraq məşq etməyə məcbur edib.

Fransız məşqçi 12 il müddətinə məşqçilik etməkdən məhrum edilib. Cinayət işi davam edir və o, bütün ittihamları rədd edir.

Qeyd etmək lazımdır ki, triatlon üç davamlı mərhələdən ibarət Olimpiya idman növüdür: üzgüçülük, velosiped sürmə və qaçış.

Publika.az