FİFA şərhçini dünya çempionatından kənarlaşdırdı - Türkiyə ilə oyunda...

Beynəlxalq Futbol Federasiyası (FİFA) paraqvaylı şərhçi Xorxe Veranı akkreditasiyadan məhrum edib.

Publika.az xəbər verir ki, bu barədə "Ole" nəşri məlumat yayıb.

Buna səbəb onun dünya çempionatının qrup mərhələsinin ikinci turunda Türkiyəyə qarşı keçirilən matçda Paraqvay millisinin oyunçusu Migel Almironun meydandan qovulmasına verdiyi emosional reaksiya olub. Birinci hissənin sonunda hakim İvan Barton Almirona qırmızı vərəqə göstərib. Canlı yayımda Vera hakimə, FİFA prezidenti Canni İnfantinoya və KONMEBOL rəhbəri Alexandro Domingesə qarşı kəskin tənqidlər səsləndirib.

"Barton, sən oğrusan. Onlar bizim oyunçumuzu əlimizdən aldılar. FİFA, futbolu bu zibilə çevirdiyin üçün məsuliyyəti öz üzərinə götür. Alexandro Dominges, KONMEBOL rəhbəri kimi, sən bir şey etməlisən, cəsarətli ol, İnfantino ilə daha az şəkil çəkdir. Lənətə gəlmiş oğrular. Bu bir rüsvayçılıqdır", - deyə Vera canlı yayımda bildirib.

Daha sonra şərhçi dediyi sözlərə görə üzr istəyib. Buna baxmayaraq, "ABC" telekanalı onu dünya çempionatına həsr olunmuş bütün proqramlardan kənarlaşdırıb.

Xatırladaq ki, dünya çempionatı iyunun 11-dən iyulun 19-dək ABŞ, Meksika və Kanadada keçirilir. Hazırkı dünya çempionu 2022-ci ilin finalında Fransa milli komandasını məğlub edən Argentina yığmasıdır.

Hüseyn İbadlı