Azərbaycan həndbolunda böhran: Çempionat keçirilməyəcək?

Azərbaycan idmanında növbəti qalmaqal yaşanır.

Publika.az xəbər verir ki, bu dəfə Azərbaycan Həndbol Federasiyası (AHF) gündəmdədir. Qurum uzun müddətdir maliyyə böhranı yaşayır.

Xeyli vaxtdır federasiya maliyyə öhdəliklərini yerinə yetirmir. Kişi və qadınların ölkə çempionatında iştirak edən ümumilikdə 10 klubda maaşlar ödənilməyib.

Həndbolçulara mart, aprel və may aylarının məvacibləri ödənməyib.

Problemlər bununla bitmir. Yeni mövsümün startına az vaxt qalsa da, qurum heç bir addım atmır. İştirakçı klublara heç bir məlumat verilmir.

Problemlərin həlli üçün federasiyanın prezidenti Saleh Məmmədova müraciət olunub. O isə öz növbəsində Azərbaycan Avtomobil Yolları Dövlət Agentliyinin İdarə Heyətinin sədri vəzifəsindən ayrıldıqdan sonra AHF-ni saxlamaq iqtidarında olmadığını bildirib.

Vəziyyətlə bağlı Gənclər və İdman Nazirliyinə də müraciət edilib. Lakin dövlət qurumu məsələyə biganə münasibət bəsləyib. Maaşlarını ala bilməyən bir qrup şəxs nazir Fərid Qayıbovun qəbulunda da olub. O, köməklik edə bilməyəcəyini bildirib.

Müəllif: Tural