Bundesliqada qapıçılar şokdadır - Səbəb bəllidir

Yeni mövsümün əvvəlində “Adidas Torfabrik” topları birinci və ikinci Bundesliqaya qayıdıb və bu, bir çox qapıçı arasında narazılığa səbəb olub.

Publika.az xəbər verir ki, oyunçuların reaksiyaları barədə “Bayern & Germany” məlumat yayıb.

“Biz əvvəllər “Derbystar” ilə oynayırdıq, amma “Torfabrik” “Derbystar”dan daha sürətlidir. Onu vurmaq asandır, ona görə də meydan oyunçuları üçün daha uyğundur. Qapıçının daha yüksək sürətə reaksiya verməsi üçün daha az vaxtı qalır.

Bilirəm ki, topu dəyişdirmək qərarı bir çox qapıçını çaşdırıb və onlar şok və dəhşət içindədirlər. Ən azından, indiyə qədər belə təəssüratım var”, – deyə “Hamburq”un qapıçısı Daniel Hoyerd bildirib.

“Dinamo Drezden”in hücumçusu Yakob Lemmer əlavə edib ki, “yeni top qapıçılar üçün əsl sınaq olub, çünki o, sürətlə və gözlənilmədən uçur”.

Mənbənin məlumatına görə, bu top artıq 2010-cu ildən 2018-ci ilə qədər Almaniya futbolunda istifadə olunub.

“Adidas Torfabrik” topunun geri qaytarılması artıq ikinci divizion oyunlarında yüksək qol nisbətinə səbəb olub – ikinci Bundesliqanın birinci turunda doqquz oyunda 31 qol vurulub.

Publika.az