Dəbilqəsinə ilan girdi, xəbəri olmadan bir saat futbol oynadı

ABŞ-da məktəb liqasında çıxış edən amerikalı futbolçu dəbilqəsinin içində zəhərli ilan olduğunu bilmədən təxminən bir saat meydanda oynayıb.

Publika.az xəbər verir ki, hadisə Arkanzas ştatının Maumell şəhərində baş verib.

Maumell Heyvanların Mühafizəsi Xidmətinin direktoru Kris Devisin sözlərinə görə, xidmətə Maumell orta məktəbindən zəng daxil olub. Məlumatda futbolçunun dəbilqəsinin içində ilan aşkarlandığı bildirilib.

İlkin baxış zamanı dəbilqədəki ilanın misbaş ilanı olduğu güman edilib. Lakin heyvanların mühafizəsi xidməti əməkdaşlarının daha ətraflı müayinəsi nəticəsində məlum olub ki, oyunçunun idman ləvazimatının içərisinə ABŞ-ın cənubunda, həmçinin şimalda Missuri və Virciniyanın cənub hissələrinə qədər ərazilərdə yaşayan zəhərli su mokasini daxil olub.

Daha sonra hadisə yerinə məktəb direktorunun çağırışı ilə iki polis əməkdaşı gəlib. Onlar ilanın dəbilqənin içliyində ilişib qaldığını təsdiqləyiblər. Polis əməkdaşları dəbilqəni su ilə isladıb və bunun nəticəsində ilan gizləndiyi yerdən çıxıb. Daha sonra heyvanı mühafizə xidməti əməkdaşları götürüblər.