Məşhur futbolçu Braziliyadan qalmaqalla ayrıldı

Niderland millisinin hücumçusu Memfis Depay “Korintians”la müqaviləsini yeniləməyəcək.

Publika.az xəbər verir ki, bu barədə oyunçu özü “X” səhifəsində yazıb.

Depayın “Korintians”la müqaviləsi bu ilin iyul ayının sonuna qədər idi. Tərəflər yeni müqavilə üzrə danışıqlar aparırdılar, lakin niderlandlı klubu ilkin razılaşmaları pozmaqda günahlandırıb.

“Bu müqavilənin uzadılması prezident, eləcə də idman, hüquq və maliyyə departamentləri tərəfindən açıq şəkildə razılaşdırılıb. Lakin bəzi insanlar bu müqavilədən imtina etmək qərarına gəliblər.

Mən bu vəziyyəti istəmirdim və bütün proses boyunca kluba həmişə hörmət etmişəm, amma indi maraqlarımı qorumaq üçün qətiyyətli yanaşmağa məcburam. Yaxın günlərdə ictimaiyyət qarşısında çıxış edəcəyəm, amma əmin olun ki, bu qəbuledilməz davranışın cəzasız qalmasına imkan verməyəcəyəm”, – Depay yazıb.

“Korintians” rəhbərliyi Depayın müqaviləsini yeniləməməsinin səbəbini maliyyə çətinlikləri kimi göstərib. Aprelin sonlarında klubun Depayın müqaviləsini uzatmaq üçün əlavə sponsorlar axtardığı bildirilmişdi.

Hücumçu 2024-cü ilin sentyabr ayından bəri klubdadır. Bu müddət ərzində o, bütün yarışlarda 79 oyunda 20 qol vuraraq, “Korintians”a 2025-ci ildə Braziliya Kubokunu və 2026-cı ildə Braziliya Superkubokunu qazanmağa kömək edib.