Daha bir ulduz milli karyerasını bitirdi - Təsirli paylaşım

Almaniyanın “Şalke 04” klubunun 40 yaşlı hücumçusu Edin Dzeko oktyabrın 2-də Bosniya və Herseqovina ilə İsveç arasında keçiriləcək Millətlər Liqası matçının milli komandada sonuncu oyunu olacağını açıqlayıb.

Publika.az xəbər verir ki, Dzeko bu barədə sosial mediada yazıb:

“Bəzən bu anın nə vaxt gələcəyi haqda düşünürdüm… Amma bu sözləri yazarkən hisslərimin nə qədər güclü olacağını heç vaxt təsəvvür etməzdim. 2 oktyabrda İsveçə qarşı milli komandamızda növbəti və son oyunumu keçirəcəyəm. Karyeramda bu formanı hər geyindiyim zaman hiss etdiyim qürurla heç nə müqayisə edilə bilməz. Heç nə.

Bu, mənim uşaqlıq arzum idi, ölkəmi futbol meydanında təmsil etmək şərəfinə nail olduğum 151 dəfənin hər birində özümlə apardığım bir arzu. Həmişə ilk dəfə olduğu kimi bununla fəxr etmişəm. Türkiyəyə qarşı oynadığım vaxtdan təxminən 20 il keçib. Çox şey dəyişib, mən də dəyişmişəm, amma bu formaya olan sevgim dəyişməz olaraq qalır. İndi hiss edirəm ki, kənara çəkilməyin vaxtı gəlib çatıb. Əgər milli komandanın üzvü kimi 40 yaşıma çatmışamsa, bu, ona sahib olduğum hər şeyi, hər dəfə, hər şeyi verdiyim üçündür.

Milli komandamda oynamaq mənim üçün futbolda ən emosional an idi. 2014-cü ildə ilk Dünya Kubokuna vəsiqə qazanmaq futbol həyatımın ən xoşbəxt anlarından biri olaraq qalır. Uelsə vurduğun qol, daha sonra isə mart ayında Zenitsada İtaliyaya qarşı oyunda hiss etdiyim hisslər əbədi olaraq ürəyimdə qalacaq. Həmyerlilərimin şəhərlərimizin küçələrində sevincini görmək futbolun mənə verdiyi daha bir inanılmaz hədiyyədir.

Bu əlamətdar səyahət boyunca orada olan və məni dəstəkləyən hər kəsə təşəkkür etmək üçün vaxt olacaq. Hələlik, ümid edirəm ki, həmin axşam orada olacaqsınız ki, başqa bir hissləri bölüşə bilək…

Çünki bu inanılmaz anların hər birini birlikdə yaşamışıq. Və ölkəmi təmsil etmək üçün son axşamımı məhz belə keçirmək istəyirəm: hamınız yanımda, uşaqlıqdan bəri sevdiyim və ömrümün sonuna qədər sevəcəyim köynəyi geyinərək”.

Müəllif: Tural