Miqrant böhranı “Seuta”nın planlarını pozdu: 15 futbolçu keçiddən imtina etdi

İspaniyanın “AD Seuta” klubu Şimali Afrikadakı Seuta muxtar ərazisində yaşanan sərhəd və miqrasiya böhranının təsirləri ilə üzləşib.

Publika.az xəbər verir ki, klubun prezidenti Luhay Hamido bildirib ki, transfer pəncərəsinin son günlərində komandaya keçidi prinsipial olaraq razılaşdırılan futbolçular da daxil olmaqla, 15-ə qədər potensial transfer baş tutmayıb. Buna futbolçuların, xüsusilə də onların ailələrinin şəhərdəki təhlükəsizlik vəziyyəti ilə bağlı narahatlığı səbəb olub.

Məlumata görə, iyulun sonlarından etibarən təxminən 80 min miqrant Mərakeşdən Seutaya Taraxal və Bensu dalğaqıranları ətrafındakı sahil xətti boyunca və ya üzərək keçib. Miqrant axınının kəskin artması yerli qəbul mərkəzlərinə ciddi təzyiq yaradıb. Seuta rəhbərliyi İspaniya hökumətindən milli səviyyədə fövqəladə vəziyyət elan etməyi də istəyib.

Hamido İspaniyanın “Cadena SER” radiosuna açıqlamasında transferlərin niyə baş tutmadığını izah edib.

“15-ə qədər futbolçu bizə yox dedi. Onların həyat yoldaşları və uşaqları qorxur. Onlara çatan məlumatları nəzərə alsaq, bunu başa düşmək olar. Bunu yaşamırsınızsa, vəziyyət sizə sanki mühasirədəymişsiniz kimi görünür”, – klub prezidenti bildirib.

Onun sözlərinə görə, cəmi bir ay ərzində əvvəllər turizm, iqtisadiyyat və idman baxımından müsbət vəziyyətdə olan şəhərdə atmosfer əhəmiyyətli dərəcədə dəyişib.

Bununla belə, Hamido Seutanın yalnız bir futbol klubundan ibarət olmadığını vurğulayıb. O, şəhərdə müxtəlif mədəniyyətlərin bir arada yaşadığını və futbol komandasının yerli əhali üçün mühüm birləşdirici amil olduğunu qeyd edib.

“AD Seuta” rəhbərliyi yaranmış vəziyyətə baxmayaraq, futbolçuların və məşqçilər heyətinin təhlükəsiz şəraitdə fəaliyyət göstərdiyini bildirir.

Hamido komanda üzvlərinin ailələrinin də vəziyyətdən təsirləndiyini qəbul etsə də, məşqlərin normal davam etdiyini deyib:

“Futbolçuların və baş məşqçinin ailələri, uşaqları var. Şəhərin onların düşündükləri əvvəlki yer olmadığını görürlər və bu, onlara təsir edir. Amma normal şəkildə məşq edirlər. Bura təhlükəsizdir və polis çox yaxşı iş görür”.

Klub transfer pəncərəsinin son mərhələsində potensial yeni futbolçulara Seutaya gələrək vəziyyətlə şəxsən tanış olmaq imkanı da yaradıb. Onlara heç bir öhdəlik götürmədən klubun bazasını, məşq şəraitini və iş prinsiplərini görmək təklif olunub.

Hamido bildirib ki, bütün çətinliklərə baxmayaraq, “AD Seuta” mövcud heyətlə mübarizə aparmağa hazırdır:

“Panikaya düşmürük və yalnız ani nəticələrə köklənməmişik. Futbolçuları qorumağa və onları mümkün qədər təhlükəsiz mühitdə saxlamağa çalışırıq”.

“AD Seuta” İspaniya çempionatının yeni mövsümünə də uğursuz başlayıb. Komanda ilk üç turda keçirdiyi bütün oyunlarda məğlub olub və hələ xal qazana bilməyib.

Xose Xuan Romeronun rəhbərlik etdiyi kollektiv sentyabrın 5-də 4-cü tur çərçivəsində “Selta Fortuna”nı qəbul edəcək. Qarşılaşma “Seuta” üçün mövsümdə ilk xalların qazanılması baxımından əhəmiyyət daşıyır.