Milyonlarla avro mənfəət: “Barselona” “Real”ın yolunu gedir

“Barselona” akademiyadan yetişən futbolçuların satışından gəlir əldə etmək strategiyasında “Real Madrid”in tətbiq etdiyi modeldən istifadə etməyə başlayıb.

Publika.az xəbər verir ki, “Sport” qəzetinin məlumatına görə, “Real Madrid” bu yay transferlərə 225 milyon avro sabit məbləğ xərcləyib. Lakin klub akademiyasından yetişən və əsas komandada gələcəyi olmayan futbolçuların satışlarından təxminən 210 milyon avro gəlir əldə edərək bu xərclərin böyük hissəsini kompensasiya edib.

Madrid təmsilçisi akademiya məzunlarını satarkən bir çox hallarda onların gələcək taleyinə nəzarəti də saxlayır. Klub futbolçuların geri alınması hüququnu, növbəti satışlardan pay əldə etmək imkanını və bəzi hallarda oyunçu hüquqlarının 50 faizini özündə saxlayır.

Bu strategiyanın ən diqqətçəkən nümunələrindən biri 60 milyon avroluq transfer məbləği ilə “Como”ya keçən Niko Pazdır. “Real Madrid” futbolçunun hüquqlarının qalan hissəsini də İtaliya klubuna satıb, lakin argentinalı yarımmüdafiəçini gələcəkdə 80 milyon avroya geri almaq hüququnu qoruyub.

Klub bu yay Qonsalo Qarsiyanı 40 milyon avroya “Fulhem”ə satıb. Bundan başqa, Sezar Palasios 10 milyon, Manuel Anxel Moran 4 milyon, Yakobo Orteqa 10 milyon, Viktor Valdepnyas 8 milyon və Fran Qonsales 3 milyon avroya komandadan ayrılıb.

“Real Madrid”in daha əvvəl satdığı futbolçular da kluba əlavə gəlir gətirib. Viktor Munyosun transferindən 20,5 milyon, Mario Giladan 15 milyon, Aleks Ximenesdən 12,5 milyon, Alvaro Rodrigesdən 12,5 milyon, Çema Andresdən 11,5 milyon və Mario Martindən 3 milyon avro əldə olunub.

“Barselona” isə daha kiçik miqyasda olsa da, oxşar modeldən istifadə etməyə başlayıb. Kataloniya klubu bu yay akademiyası “La Masia”dan yetişən səkkiz futbolçunun satışından təxminən 44,5 milyon avro qazanıb.

Bu məbləğə “Çelsi”nin yetirməsi Mark Kukurelyanın və “Mançester Siti”nin futbolçusu Niko Qonsalesin yetişdirilməsinə görə alınan kiçik ödənişlər, eləcə də Ansu Fatinin “Monako”ya transferindən əldə edilən 11 milyon avro daxil edilməyib.

“Barselona” da “Real Madrid” kimi bəzi futbolçuların hüquqlarının 50 faizini özündə saxlamaqla satış həyata keçirir. Eyni zamanda klub gələcəkdə onları geri almaq və ya növbəti transferlərindən qazanc əldə etmək imkanını qoruyur.

Bu yay Tommi Markes 11 milyon, Ektor Fort 8,5 milyon, Jofre Torrents 6 milyon, Qille Fernandes 4 milyon, Toni Fernandes 4 milyon və Alvaro Kortes 3,4 milyon avroya klubdan ayrılıb.

Kataloniya təmsilçisi bir il əvvəl Yan Vircili də 4,5 milyon avroya satarkən oxşar mexanizmdən istifadə edib. Futbolçunun “Real Mallorca”dan “Brügge”yə keçidi isə “Barselona”ya əlavə gəlir əldə etmək imkanı yaradıb.

Son olaraq İnyaki Penya 3 milyon avro qarşılığında komandadan ayrılıb. Lakin 27 yaşlı qapıçının transferi digər satışlardan fərqlənir. “Barselona” onun hüquqları ilə bağlı gələcək üçün hər hansı üstünlük və ya geri alma opsiyasını saxlamayıb.

Beləliklə, “Barselona”nın akademiya məzunlarının satışından əldə etdiyi ümumi gəlir təxminən 44,5 milyon avroya çatıb. Bu rəqəm klubun Ferran Torresin satışından qazandığı məbləğə yaxın olmaqla yanaşı, Karim Adeyeminin transferi üçün ödədiyi vəsaitdən də iki dəfədən çoxdur.

Beləliklə, Avropanın iki nəhəng klubu akademiya futbolçularını yalnız əsas komanda üçün potensial oyunçu mənbəyi deyil, eyni zamanda əhəmiyyətli maliyyə gəliri gətirən aktiv kimi də dəyərləndirir.