Neft ucuzlaşmaqda davam edir

Dünya birjalarında Brent tipli neftin qiyməti 85,91 dollara qədər düşüb.

Publika.az ”Bloomberg”ə istinadən bildirir ki, London birjalarında Brent tipli neftin dekabra olan “fyuçe” qiyməti 0,22 dollar ucuzlaşaraq (0,26 faiz) 85,91 dollar olub. Hansı ki, ötən həftənin cümə günü bu qiymət 86,13 dollar idi.

Nyu-Yorkun elektron ticarət bazarlarında WTI markalı neftin dekabra olan “fyuçe” qiyməti 81 dollara düşüb. Bu da 0,01 dollar ucuzlaşma deməkdir. Bazar treyderlərinin sözlərinə görə, neftin qiymətində eniş OPEK-dən hər hansı açıqlama gələnə qədər davam edəcək.

Goldman Sachs-ın analitikləri isə Brent və WTI markalı neftin proqnoz qiymətlərini aşağı salıblar. Onların fikrincə, Səudiyyə Ərəbistanının, Braziliyanın, Şimali Amerikanın, eləcə də Azərbaycanın hasilatı artırması 2015-ci ildə bazarda təklifi yüksəldəcək.

Goldman Sachs-ın 2015-ci il proqnozlarına əsasən, neftin orta qiyməti 85 dollar təşkil edəcək. WTI markalı neft üçün isə bu qiymət 75-90 dollar arasında dəyişəcək.

İqtisadiyyat şöbəsi