Tarix

Burada insanlar qurban kəsilirmiş

8 İyun 2017 18:45

Meksikanın paytaxtı Mexikonun mərkəzində arxeoloqlar asteklərin qədim məbədini və insanların qurban kəsilən meydanını üzə çıxarıblar.

Publika.az xəbər verir ki, tikilidən Kesalkoatl adlı tanrının heykəli, pilləkən və tribunanın bir hissəsi qalıb. Məbəd dəyirmi formada olub, hündürlüyü isə 4 metrə çatıb.

Qazıntılar zamanı tapılan insan sümüklərinin boyun hissəsində kəsiklər olması və ya kəllə sümüklərinin ayrıca tapılması bu insanların qurban kəsildiyinə dəlalət edir. Qurban kəsilənlər isə əsirlər və ya asteklərin top oyununda uduzanlar olurdular. Amma bu oyun dini ayin sayılmırdı, onu əyləncə və kişilik göstəricisi olaraq oynayırdılar. Qurbankəsmə isə tanrının şərəfinə icra edilirdi.

Tapılan məbəd və qurbangah 1521-ci ildə ispan konkistadorlarının xaraba qoyduğu Tenoçtitlan şəhərində yerləşirmiş.

Şəfiqə ŞƏFA