Azərbaycanın böyük dostunu niyə çərkəzlər qoruyur? - TARİXİ FAKTLAR/FOTO

İordaniya kralı, Azərbaycanın böyük dostu, II Abdullahın sarayından şəkillər paylaşılarkən, arxada Qafqaz çuxası geyinmiş hündür, qədd-qamətli qvardiyaçıları görmək olar.

Bilməyənlər təəccüblənir, İordaniya kralı ilə qafqazlıların nə əlaqəsi var?

Gəlin bu suala cavab verək.

Rusiya imperiyası 19-cu əsrin ortalarında Qafqazı tam işğal edəndən sonra Qafqaz xalqlarının bir hissəsi artıq öz vətənində yaşamaq istəməyib Osmanlı İmperiyasına köç etdi. Çərkəzlər, kabardin-balkarlar, Dağıstanda yaşayan digər xalqlar, ümumilikdə, bir milyona qədər insan doğma torpaqlarını tərk etdi.

O zaman Osmanlı imperiyasının ərazisi indiki İsrail, Fələstin, Suriya, hətta Misiri də əhatə edirdi.

Çərkəzlər indiki İordaniyanın paytaxtı Ammana gəlib çıxdılar. O vaxt bu ərazi Roma imperiyasından qalmış xarabalıqlardan ibarət idi.

I dünya müharibəsində ingilislər müstəqillik vədilə ərəb tayfalarının başını aldadıb, onları osmanlılara qarşı qaldırdılar, vaxtilə Osmanlı sarayında yaşayan, Məkkə şərifinin oğlu, peyğəmbər nəslindən olan Abdullah ibn Hüseyn türklərə qarşı çıxdı və 1922-ci ildə İordaniyanın əmiri təyin olundu.

Amma faktiki hakimiyyət 1946-cı ilə qədər ingilislərin əlində idi.

Növbə çatdı çuxalı çərkəzlərə...

I Abdullah bu torpaqlara gələndə bədəvi ərəblər ona qarşı çıxırlar, hətta öldürmək də istəyirlər.

Amma artıq sayları çoxalmış çərkəzlər Abdullahın tərəfini tuturlar, onu qoruyurlar.

Həmin vaxtdan bu günə qədər İordaniya padşahının sarayında mühafizə işi çərkəz xalqının nümayəndələrinə həvalə olunub. Kral qvardiyası onlardan ibarətdir.

Onlar öz milli geyimlərini bu günədək dəyişməyiblər.

İordaniya ordusunda, parlamentdə, diplomatlar arasında da çərkəzlərə rast gəlmək olar.

Mir Səməd