Rusiyada SEL FƏLAKƏTİ: 352 bağ evi su altında qaldı

Xabarovskda 352 bağ evi Amur çayında suyun səviyyəsinin qalxması səbəbindən daşqın zonasında qalıb.

Publika.az xəbər verir ki, bu barədə Rusiya Fövqəladə Hallar Nazirliyinin regional baş idarəsinin mətbuat xidmətindən məlumat verilib.

Bildirilib ki, Amurda suyun səviyyəsi 13 santimetr artaraq əlverişsiz hadisə həddini keçib. Bu səbəbdən Xabarovsk diyarında Bolşoy Ussuriyski, Kabel və Daçnı adalarında bağ evləri su altında qalıb.

Fövqəladə Hallar Nazirliyinin əməkdaşları bağ evlərində keşik çəkərkən daşqınla bağlı vəziyyətə aydınlıq gətirir, həmçinin torpaq sahələrinin sahibləri ilə söhbətlər aparırlar.

Amurda suyun səviyyəsinin artması, yağıntılar və kiçik çayların axması nəticəsində yaşayış sahəsi olmayan 185 torpaq sahəsi su altında qalıb.

Bundan başqa, Xabarovsk diyarının dörd bələdiyyə rayonunda qəsəbədaxili avtomobil yollarının beş hissəsi, qəsəbələrarası avtomobil yollarının dörd hissəsi və idarəyə məxsus yolun bir hissəsi su altında qalıb, bir körpü yararsız hala düşüb.

Avqustun 24-25-də Xabarovsk yaxınlığında daşqının yaxınlaşması gözlənilir. Yaxın bir neçə gün ərzində Amurda suyun səviyyəsinin qalxması davam edəcək və 470-500 santimetrə çata bilər. Bu səbəbdən də Amur kanalı boyunca yerləşən sel düzənliklərinin, alçaq relyefli ərazilərin, bağ evlərinin və təsərrüfat sahələrinin, yolların və onun aşağı axınında kanalların su basması ehtimalı var.

Yağıntılar səbəbindən Bureya, Kür, Amgun, Nimelen və Tunquska çaylarının daşqın sahələri də su altında qalıb. Uda çayı hövzəsində məişət obyektlərinə təhlükə olmadan suyun səviyyəsinin 0,5-1 metr artaraq 630-680 santimetrə çatacağı gözlənilir.

Hüseyn İbadlı