Əli Kərimli AXCP-nin adını Yurd Partiyasına dəyişir

Azərbaycan Xalq Cəbhəsi Partiyasının (AXCP) sədri Əli Kərimli yeni partiya yarada bilər.

Publika.az xəbər verir ki, sosial şəbəkələrdə yayılan bu məlumat ciddi müzakirələrə səbəb olub. Məlumata görə, Ə. Kərimli qurultayın nəticələrinin Ədliyyə Nazirliyi tərəfindən geri qaytarılmasından sonra bu qərara gəlib.

Qeyd edək ki, Razi Nurullayevin AXCP Etimad Qurultayı adı ilə sənəd təqdim etdiyini əsas gətirən Ədliyyə Nazirliyi “eyni hüquqi şəxsin rəhbər orqanlarının formalaşdırılması barədə bir-birinə zidd olan müraciətlərin daxil olduğunu nəzərə alaraq” sənədləri geri qaytarıb. Qanuna uyğun olaraq, mübahisəli məsələnin həlli üçün məhkəməyə müraciət edilməsi təklif olunub.

Məlumata görə, Əli Kərimli mübahisəli məsələni həll etməyin vaxt alacağını əsas gətirərək, yeni adda partiya yaradıb qeydiyyatdan keçmək niyyətindədir. Ədliyyə nazirliyinin cavabından sonra Əli Kərimlinin “facebook” səhifəsində “AXCP sədri kimi deyil, vətəndaş Əli Kərimli kimi müxalifət mövqeyini paylaşır, əgər partiyanın adı dəyişəcəksə, bu onların mövqeyinin dəyişməsi demək deyil” kimi açıqlaması da məlumatları təsdiqləyir. Məlumatlara görə, Əli Kərimli rəhbərlik etdiyi partiyanın adını Yurd Partiyası ilə dəyişə bilər.

Alternativ AXCP-nin sədri Razi Nurullayev Publika.az-a açıqlamasında deyib ki, Ədliyyə Nazirliyinin Əli Kərimlinin qurultay sənədlərini geri qaytarması onların tam hüquqlu AXCP kimi tanınması ehtimallarını artırır: “Əli Kərimli AXCP sədri olan zamanlarda partiyanın nizamnaməsini dəfələrlə pozub. Qurultayın keçirilməsini bir neçə il ləngidib. Rayon konfranslarını saxta cəbhəçilərlə keçirib. Ədliyyə Nazirliyi bunları nəzərə aldı”.

Asif