YAP-dan NİDA-çı gəncin müraciətinə MÜNASİBƏT

“Bu gənc Prezidentə müraciət etməklə cəmiyyət qarşısında səhvini boynuna aldı”.

Bu barədə YAP Siyasi Şurasının üzvü, millət vəkili Aydın Mirzəzadə Publika.az-a açıqlamasında həbsdə olan NİDA-çı gənc Bəxtiyar Quliyevin bağışlanması üçün dövlət başçısına müraciət etməsinə münasibət bildirərkən deyib.

A. Mirzəzadə qeyd edib ki, bu gün məhkum olan gənc səhv yolda olduğunu etiraf etməklə təəssüflənir: “O, səhvini etiraf edir və digər gəncləri də eyni səhvi etməkdən çəkindirir. Eyni zamanda, bu gəncin məktubu göstərir ki, radikal müxalifətin təhrik etdiyi NİDA hərəkatı onların gəncləri səhv yola çəkməsi demək imiş”.
YAP-çı deputat bildirib ki, digər gənclərin də gələcəkdə belə müraciətlər etməsi mümkündür.
“Siyasi baxışlardan asılı olmayaraq, gənclərin öz səhvini etiraf etməsi, düz yola çıxması müsbət hal kimi qiymətləndirilməlidir”,– deyə A. Mirzəzadə diqqətə çatdırıb.

Qeyd edək ki, həbsdə olan “Nida” Vətəndaş Hərəkatının üzvü Bəxtiyar Quliyev kütləvi informasiya vasitələrinə bəyanat ünvanlayıb.

Ədliyyə Nazirliyi Penitensiar Xidmətinin ictimaiyyətlə əlaqələr şöbəsindən verilən məlumata görə, Bakı İstintaq təcridxanasında saxlanılan məhkum Quliyev Bəxtiyar Səməndər oğlu müraciətdə təxribatçı qüvvələrin təsiri altında cinayət əməli törətdiyini, həbsdə olduğu müddət ərzində bunu anladığını qeyd edib, “siyasi məhbus” adlandırılmasına qəti etirazını bildirib.

O, “Nida” Vətəndaş Hərəkatının üzvlüyündən imtina etdiyini də qeyd edib.

Asif