Tatar Azərbaycan nümayəndələrini qəbul etdi

Şimali Kipr Türk Cümhuriyyətinin (ŞKTC) Prezidenti Ersin Tatar Azərbaycandan gedən nümayəndə heyətini qəbul edib.

Publika.az xəbər verir ki, Ersin Tatar azərbaycanlı qonaqları ŞKTC-nin suverenlik Prezident Administrasiyası binasında qəbul edib.

Azərbaycandan gələn nümayəndələri qarşılamaqdan məmnunluğunu dilə gətirən E.Tatar mənəvi duyğuların və tarixdən gələn bağların önəmli olduğunu vurğulayıb.

ŞKTC-nin “Şəhidlər diyarı" olduğunu ifadə edən Ersin Tatar var olmaq mücadiləsində qəhrəmancasına savaşıb, şəhid olan soydaşları olduğunu, Kıbrıs türk xalqına qarşı qətliamların yaşandığını və xüsusilə, Qanlı Miladda yaşanan acının əsla unudulmayacağını söyləyib:

“Kiprin türk xalqı hər zaman Ana Vətən Türkiyəyə güvənib. Kıbrısda bir anlaşma olacaqsa, iki dövlət təməlində olmalıdır. Bərabər beynəlxalq statusumuzun qəbul edilməsi gərəkdir. Yoxsa bizi federasiya adı altında assimilyasiya edəcəkdilər. Türkiyənin zəmanəti və türk əsgəri adada olmasaydı, durum başqa cür olacaqdı. Sabitlik üçün Türkiyənin zəmanəti və türk əsgərlərinin adada olması bizim qırmızı xəttimizdir. Biz ayrı dövlətik, ayrı torpağımız, xalqımız, sərhədlərimiz var. Türkiyə Cümhuriyyəti ŞKTC-ni tam olaraq tanıyır və hər zaman onun arxasındadır.

Azərbaycan xalqı ilə hər cür fəaliyyətin artması bizi sevindirir. Biz eyni millətin övladları olaraq dili, dini, mədəniyyəti və könül birliyini paylaşırıq, biz Azərbaycan xalqının əsl qardaşlarıyıq. Bu münasibətlə bütün Azərbaycan xalqına ən səmimi hörmət və salamımı çatdırıram”.

Azərbaycandan gedən nümayəndə heyəti ŞKTC-də olmaqdan çox məmnun olduqlarını və iki xalqın bir-birinə duyğusal bağlarla bağlı olduğunu vurğulayıb və onları qəbul etdiyi üçün Prezident Ersin Tatara təşəkkür ediblər.

Nümayəndə heyətinə Milli Məclisin deputatları Ramil Həsən, Anar İsgəndərov, Elşad Mirbəşiroğlu, Türk Ağsaqqallar Birliyinin sədri Südeyif İmamverdiyev, jurnalist Nicat Dağlar, diaspor araşdırmaçısı Elnur Eltürk və Hüseyn Hacıyev daxildir.

Qəbulda ŞKTC Prezident Adminstrasiyası Mətbuat, Araşdırma və Arxiv müşaviri Aydın Akkurt və Beynəlxalq Əlaqələr və Diplomatiya üzrə xüsusi müşaviri Prof. Dr. Hüseyn İşıqsal da iştirak edib.