Nida Təhlil
Abbaszadəyə geyindirilən don və terroru legitimləşdirmək PLANI
Azərbaycan dövlətinə qarşı çağırışlar edən və ölkənin
parçalanması istiqamətində erməni xüsusi xidmət orqanlarının
planlarında yer alan Fəxrəddin Abbaszadə (özünü Faxroddin Abboszoda
adlandırır) Dövlət Təhlükəsizlik Xidməti tərəfindən həbs olundu.
Ona qarşı Cinayət Məcəlləsinin 281.2 (Dövlət əleyhinə yönələn açıq
çağırışlar) və 283.1-ci (Milli, irqi nifrət və düşmənçiliyin
salınması, milli ləyaqətin alçaldılması) maddələri üzrə cinayət işi
açılıb.
Bu, Azərbaycanın suverenliyinə qarşı təhdidin aradan qaldırılması
deməkdir. Çünki F.Abbaszadə bütün fəaliyyəti boyunca talış
vətəndaşlarımızın adından sui-istifadə etməklə Ermənistanın
Azərbaycana qarşı planlarında yer alıb.
Vətən xaini olan bu şəxs dəfələrlə Azərbaycana qarşı açıq
çağırışlar edib.
“Regionun sabitliyi üçün əsas təhlükə Azərbaycandır. Bu
təhlükəni həmişəlik aradan götürmək üçün ruslarla, ermənilərlə
birləşmək lazımdır”.
“Əgər Azərbaycan Qarabağ məsələsini həll edəcəksə, onda etnik
mənşəcə talış olan vətəndaşların məhvinə başlayacaq”.
“Rusiya Dağlıq Qarabağın müstəqilliyini tanımalıdır”.
“Azərbaycan adlı kvazidövlət dağıdılacaq”.
Erməni millətçilərinin jarqonundan çıxmış bu çağırışları məhz
F.Abbaszadə Azərbaycana qarşı edirdi. Buna rəğmən, suveren bir
ölkəni – “Azərbaycanı dağıtmağa” çağırış edən bu şəxsin dövlət
tərəfindən zərərsizləşdirilməsinə birmənalı münasibət
sərgiləməyənlər də var.
Xüsusilə F.Abbaszadənin həbsinə ötən il Gürcüstanda Azərbaycan
dövlətinin əleyhinə göstərdiyi fəaliyyətə görə həbs edilərək ölkəyə
gətirilən Əfqan Muxtarlı kimi “xüsusi xidmət orqanları tərəfindən
oğurlandığı” görüntüsü verilməsinə cəhd diqqətdən yayınmır. Misal
üçün, “Amnesty İnternational” təşkilatı F.Abbaszadənin Rusiyadan
Lyubertsı şəhər İstintaq Təcridxanasından “yoxa çıxdığını” iddia
edir və onun hüquqlarının müdafiəsi üçün Rusiya Federasiyası
hökumətinə müraciət edir. Belə görüntü yaradılır ki, sanki
Azərbaycanın xüsusi xidmət orqanları bu şəxsi qanunsuz şəkildə
oğurlayıb.
Eyni ssenaridir, Əfqan Muxtarlının qanun qarşısında çıxarılması
zamanı Azərbaycana qarşı bu iddialarla hücum edilmişdi, indi də
eyni mənzərənin yaradılmasına cəhd olunur.
Gürcüstanda məskən salan Ə.Muxtarlı Azərbaycanda xaos ssenarisi
hazırlayanların daxildəki qüvvələrə maliyyə yardımının həyata
keçirilməsində körpü rolunu oynayırdı. Onun haqqında cinayət işi
açılmışdı və sərhədi keçərkən qanunvericiliyə uyğun olaraq həbs
edildi. Lakin bu addım daxildə və xaricdəki qüvvələr tərəfindən
“oğurlanma” olaraq təqdim edilirdi, məqsəd dövlət təhlükəsizliyinin
qarşısının alınması addımının “hüquqdan kənar” proses olaraq
göstərilməsi və beynəlxalq təşkilatların Azərbaycana qarşı
qaldırılması idi.
F.Abbaszadə məsələsində də analoji ssenari işə düşür. Onun
Rusiyadakı təcridxanadan “yoxa çıxdığı” deyilir və belə təqdim
olunur ki, bu şəxs Azərbaycan tərəfindən “oğurlanıb”. Məsələnin bu
cür təqdim edilməsində məqsəd Azərbaycanın dövlət quruluşunun
devrilməsinə çalışan, separat fəaliyyəti ilə tanınan F.Abbaszadənin
“insan haqlarının müdafiəçisi” obrazında tanıdılmasıdır. Bu
prosesin arxasında F.Abbaszadənin bütün fəaliyyəti boyunca
əməkdaşlıq etdiyi erməni xüsusi xidmət orqanları və erməni
diasporu/lobbisi dayanır. Erməni lobbisinin təsirində olan və
mütəmadi olaraq Azərbaycana qarşı çıxış edən “Amnesty
İnternational”ın F.Abbaszadə məsələsində tutduğu mövqe də təsadüfi
deyil.
Halbuki, F.Abbaszadənin həbsi Azərbaycan Respublikasının
qanunvericiliyinə uyğun həyata keçirilib. 2018-ci ilin 12 iyulunda
ona qarşı Cinayət Məcəlləsinin 281.2-ci (Dövlət əleyhinə yönələn
açıq çağırışlar, hakimiyyətin zorla ələ keçirilməsinə, zorla
saxlanılmasına və ya Azərbaycan Respublikasının konstitusiya
quruluşunun zorla dəyişdirilməsinə və ya ərazi bütövlüyünün
parçalanmasına yönələn açıq çağırışlar etmə, habelə bu cür məzmunlu
materialları yayma) və 283.1-ci (Milli, irqi, sosial və ya dini
nifrət və düşmənçiliyin salınmasına, milli ləyaqətin
alçaldılmasına, habelə milli, irqi və ya dini mənsubiyyətindən
asılı olaraq vətəndaşların hüquqlarının məhdudlaşdırılmasına və ya
üstünlüklərinin müəyyən edilməsinə yönələn hərəkətlər, aşkar
surətdə, o cümlədən kütləvi informasiya vasitələrindən istifadə
olunmaqla törədildikdə) maddələri ilə cinayət işi açılıb. Ardınca
Baş Prokurorluğu təşəbbüsü ilə F. Abbaszadə beynəlxalq axtarışa
verilib. Nəhayət 2018-ci ilin sentyabrında Rusiya hüquq-mühafizə
orqanları tərəfindən Moskva ətrafındakı Lyubertsı şəhərində
saxlanılıb və 2019-cu ilin fevralında Azərbaycana təhvil
verilib.
Azərbaycanın bu şəxsi beynəlxalq axtarışa verməsi və Rusiyanın onu
Azərbaycana təhvil verməsi qanunvericilik çərçivəsində həyata
keçirilib. Çünki F.Abbaszadə Azərbaycana qarşı terrorçu fəaliyyətlə
məşğul olub və beynəlxalq hüquq hər bir ölkəyə onun suverenliyinə,
ərazi bütövlüyünə, konstitusion quruluşuna təhdid törədən hallara
qarşı mübarizə aparmaq, belə halları aradan qaldırmaq hüququ verir.
F. Abbaszadə məhz Azərbaycanın ərazi bütövlüyünə, suverenliyinə,
onun konstitusion quruluşuna qarşı çıxır, bununla bağlı açıq
çağırışlar edirdi.
Fəxrəddin Abbaszadə kimdir?
Bu terrorçunu “insan haqlarının müdafiəçisi” kimi təqdim etməyə
cəhd edənlərə bir daha onun kimliyini xatırlatmaq lazımdır. 1956-cı
ilin 25 dekabrında Lerik rayonunda anadan olan F. Abbaszadə 1993-cü
ildən başlayaraq Azərbaycana qarşı separatçılıq fəaliyyəti ilə
məşğul olub. Vaxtilə Azərbaycanı bölməyə çalışan Əlikram Hümbətovun
yaratdığı “Talış Muğan respublikası Milli Məclisinin sədri” olub.
Sonradan Rusiyaya qaçan F.Abbaszadə həbs olunduğu günə qədər
Azərbaycan dövlətinin əleyhinə fəaliyyət göstərib. Torpaqlarımızı
işğal edən Ermənistana mütəmadi səfərlər edən F.Abbaszadə elə
İrəvandan Azərbaycanın bölünməsi çağırışlarını edib. O, erməni
xüsusi xidmət orqanlarının çox etibar etdiyi şəxsdir, hətta Əlikram
Hümbətovla müqayisədə ermənilər F.Abbaszadəyə dəstək verdilər. Belə
ki, vaxtilə Ə.Hümbətovla F.Abbaszadə arasında pul bölgüsü üzərində
qarşıdurma yaranmışdı. Bu qarşdurmada ermənilər F.Abbaszadəni
dəstəklədilər. Ermənistanın Azərbaycana qarşı yaratdığı xüsusi
ideoloji təxribat qrupu olan “Panduxt” tərəfindən Əlikram
Hümbətovun təhqir olunması da məhz F.Abbaszadəyə dəstək xarakteri
daşıyırdı.
Azərbaycanın talış vətəndaşlarının adından istifadə edən bu Vətən
xaininin həbsinin siyasiləşdirilməsi də məhz erməni xüsusi xidmət
orqanlarının planının bir hissəsidir.
Asif Nərimanlı - https://asifnerimanli.wordpress.com/
-
Kriminal16:33
Özünü ölmüş kimi təqdim edən biznesmenə hökm oxundu
-
MDB16:00
Avropa Yer üzündən silinəcək, Amerika isə... - Belarusdan şok hədə
-
Rəsmi xronika15:29
İlham Əliyev və Japarov Ağdamda - FOTOLAR
-
Sosial14:51
Videomu paylaşıb məni biabır etmək istəyirlər - Cahangir Əsgərov
-
Sosial14:16
Elmira Süleymanova vəfat etdi - FOTO
-
Cənubi Qafqaz13:40
İrəvandan İlham Əliyevin təklifinə cavab gəldi: Hazırıq!
-
Sosial13:03
Prokurorluqdan Nəsib Quliyevin intihar faktı ilə bağlı çağırış: bu məlumatlar...
-
Sosial12:25
Baş nazir təyin olunan Ceyhun Cəlilov kimdir? - Dosye