Zərifə Əliyeva - Könüllərə məlhəm olan nurlu şəxsiyyət

Zərifə xanım Əliyeva respublikamızda tibb elminin inkişafına mühüm töhfələr verərək oftalmologiyanın aktual problemlərinə dair sanballı tədqiqatları ilə nəinki keçmiş SSRİ məkanında, həmçinin dünya miqyasında şöhrət qazanıb. Onun elmi-pedaqoji və ictimai fəaliyyəti həkimlərin yeni nəslinin yetişməsinə və Azərbaycanda oftalmologiya elminin inkişafına güclü təsir göstərib.

Publika.az xəbər verir ki, bu sözləri millət vəkili Məlahət İbrahimqızı deyib. Deputat bildirib ki, Zərifə Əliyeva oftalmologiya sahəsində görkəmli alim olmaqla yanaşı, Azərbaycan qadınına xas olan ən ülvi, nəcib dəyərləri özündə yaşadan xanım-xatın ziyalı, şəfalı əllərilə gözlərə işıq bəxş edən, həlim xasiyyəti ilə könüllərə məlhəm olan nurlu şəxsiyyət idi:

“Akademik Zərifə xanım Əliyevanın zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin tarixinə parlaq səhifələr kimi yazılıb. Zərifə xanım müstəqil Azərbaycan dövlətinin memarı və qurucusu, bütün mənalı ömrünü vətəninin və xalqının tərəqqisinə həsr etmiş dahi şəxsiyyətin - ümummilli lider Heydər Əliyevin vəfalı ömür-gün yoldaşı, sədaqətli dostu və etibarlı silahdaşı olub. Zərifə xanım həmişə ulu öndərimizə mənəvi dayaq, arxa olub. O, həmçinin, Azərbaycan xalqına layiqli övladlar yetişdirən gözəl anadır. Onun əziz xatirəsi daim Azərbaycan xalqının qəlbində yaşayacaq”.