Azərbaycan-Ermənistan sərhədi bu xəritələrə əsasən çəkilir – Politoloq detalları açdı

“Azərbaycan tərəfinin Azərbaycan-Ermənistan sərhədinin bütün uzunluğu boyunca nəzarəti bərpa etmək üçün həyata keçirdiyi tədbirlər üçtərəfli bəyanatda qeyd olunan müddəalara əsaslanır. Eyni zamanda, Azərbaycan 1975-76-cı illərin sovet hərbi topoqrafik xəritələri əsasında sərhədlərin qanuni konsolidasiyasını həyata keçirir”.

Publika.az xəbər verir ki, bu barədə politoloq İlqar Vəlizadə Azərbaycan-Ermənistan sərhədində dəqiqləşdirilmələrlə bağlı yaranmış narahatlıqlarla əlaqəli sosial şəbəkədə hesabında bəhs edib.

Politoloqun fikrincə, bu prosesin ardıcıl getməsi və məntiqi məqsədi sərhəd bütövlüyü amilinə əsaslanır: “Bütün Azərbaycan-Ermənistan sərhədi boyu sərhədlərimizə tam nəzarətin bərpası indiki məqamda Azərbaycan üçün çox vacibdir. Əlbəttə ki, Kərki və Yuxarı Əskipara kəndlərinin ətrafındakı eksklav ərazilərin Azərbaycanın nəzarətinə qaytarılması nəzərə alınmaqla bu proseslər baş verməlidir. Təbii ki, Bakı indiki mərhələdə erməni tərəfinin reaksiyasına, xüsusən də daxili siyasi “eniş-yoxuş”ları bu cür mürəkkəb bir proseslə əlaqələndirmək cəhdinə əhəmiyyət verməməyə çalışır”.

İlqar Vəlizadə hazırda iki ölkə arasındakı sərhədlərin “sıfır nöqtələri”nin koordinatlarının müəyyənləşdirildiyi 1975-76-cı illərə aid sovet hərbi topoqrafik xəritələrinin fotosunu da paylaşıb.

Tural Turan