Aydın Hüseynov: Azərbaycanın mədən sənayesinin effektiv idarə edilməsində Zimbabveyə nümunə ola bilər

“Azərbaycan dünyaya bir çox yeniliklər və modellər bəxş edib. Dünya dövlətləri də bu imkandan yararlanırlar”.

Bu sözləri Publika.az - a açıqlamasındamillət vəkili Aydın Hüseynov Zimbabve Prezidenti Emmerson Mnanqaqvanın ölkəmizə səfərini şərh edərkən deyib.

A.Hüseynov bildirib ki, “ASAN Xidmət”in iş prinsipi, vətəndaşların rahatlığı çevikliyi ilə seçilir və bu səbəbdən dünyada böyük marağa səbəb olur:

“Bir neçə aydan sonra pensiyaların verilməsi ilə bağlı DOST Mərkəzləri fəaliyyət göstərəcək. Bu modelin də dünyanın bir sıra ölkələri tərəfindən bəyənilib, öyrəniləcəyinə inanıram. Ən başlıcası ölkəmizin həyata keçirdiyi müstəqil xarici siyasətdir. Bu siyasətin ən başlıca məqsədi Azərbaycan vətəndaşlarının rahatlığının təmin edilməsi, sosial rifahının gücləndirilməsi, maraqlarının qorunmasıdır. Bu istiqamətdə Azərbaycanın böyük layihələri var, bu da təbii olaraq ölkəmizi digər dövlətlərin diqqət mərkəzinə çevirir. Burada cənab Prezidentin apardığı siyasətin mahiyyəti üzə çıxır”.

Millət vəkili bildirib ki, Zimbabve təbii resurslarla, o cümlədən 60-dan artıq mineral növləri ilə zəngin olsa da, lazımı inkişaf səviyyəsinə çatmayıb:

“Bu baxımdan Zimbabve tərəfi Azərbaycanın düzgün idarəçilik təcrübəsinə, struktur xarakterli, iqtisadi islahatlar təcrübəsindən yararlana bilər. Bundan başqa Azərbaycanın mədən sənayesinin effektiv şəkildə idarə edilməsi baxımından bu ölkə üçün nümunə ola bilər”.