Azərbaycan-Türkiyə birliyi region üçün sabitlik, sülh imkanları yaradır - Mollazadə

“Əslində mən çox istərdim ki, bu ortaq layihə bölgədə sabitliyə qarşı hər hansı bir təxribat cəhdləri olarsa, onun qarşısını almağa xidmət etsin. Türkiyə Silahlı Qüvvələri Azərbaycanda yerləşməklə hansısa “revanş” barədə düşünən qüvvələrin qarşısında demək olar ki, çox ciddi maneə yaradacaq”.

Bunu Publika.az-a Milli Məclisin deputatı, Azərbaycan Demokratik İslahatlar Partiyasının (ADİP) sədri Asim Mollazadə Türkiyə-Rusiya Birgə Monitorinq Mərkəzinin fəaliyyətə başlaması ilə bağlı danışarkən deyib.

ADİP sədri bildirib ki, bu Monitorinq Mərkəzi açılandan sonra hansısa təxribat, diversiya aksiyalarını, hərəkətlərini həyata keçirmək mümkün olmayacaq: "Ən müasir avadanlıqlarla təmin olunmuş bu mərkəz bölgəni tam nəzarətdə saxlaya biləcək. Onu da qeyd edim ki, hazırda Azərbaycan-Türkiyə münasibətlərinin dünyada heç oxşarını da tapmaq mümkün deyil. Bu çox mühüm bir düsturla inkişaf edib. Biz hamımız öyrəşmişik ki, bir millət-iki dövlət düsturu bizim münasibətlərimizi formalaşdırır. Amma bununla yanaşı, bizim ortaq dəyərlərimiz üzərində formalaşan çox ciddi ortaq maraqlarımız var. Azərbaycan-Türkiyə birliyi əslində region üçün böyük əməkdaşlıq, sabitlik, sülh imkanları yaradır”.

Tural Turan