Bu anım yürüşü bütün dünyaya göstərdi ki... - Politoloq

“Vətən müharibəsinin başlanmasının ildönümündə şəhidlərimizin xatirəsinə həsr edilmiş anım yürüşü şəxsən məndə qürur hissini coşdurdu. Çox möhtəşəm idi”.

Bunu Publika.az-a açıqlamasında politoloq Qabil Hüseynli deyib.

Politoloqun fikrincə, bu anım yürüşü ilə bütün dünyaya, eləcə də düşmən Ermənistana necə millət olduğumuzu nümayiş etdirdik: “Bu yürüşlə hansı formada birlik nümayiş etdirdiyimizi çox gözəl şəkildə sərgilədik. Prezidentin, onun xanımının Cəmşid Naxçıvanski adına hərbi liseyin tələbələri ilə birlikdə ötən gün təməli qoyulan Zəfər Muzeyinin yerləşdiyi əraziyə qədər yürüş etmələri qeyri-adi idi. Eyni zamanda bu anım yürüşünü Azərbaycan xalqının intellektual və mədəni səviyyəsini bütün dünyaya nümayiş etdirən qeyri-adi mənzərə hesab edirəm.

Üstəlik, yağı düşmənə, bizim haqqımızda uydurma fikir səsləndirənlərə, aşağılayıcı fikirlər söyləyənlərə bəlli oldu ki, Azərbaycan dünyanın super dövlətidir. Regionun super gücüdür. Dünənki tədbirin təşkilindən qürur duydum. Zəfər Muzeyinin təməlinin atılması isə müstəqil Azərbaycanın hərb tarixinin ən gözəl səhifələrindən biridir. Bu muzey şəhidlərimizin xatirəsinin əbədiləşdirilməsi üçün ən gözəl addımlardan biridir. Gələcək nəsillərin təlim-tərbiyəsində mühüm rol oynayacaq and yerimiz, məbədimizdir”.

Tural Turan