Erməni revanşistlər parlament rəhbərliyindən qovuldular

Ermənistan parlamentinin bu gün keçirilən növbədənkənar iclasında “Ermənistan” fraksiyasının deputatları İşxan Saqatelyan və Vahe Akopyan tutduqları vəzifələrdən kənarlaşdırılıblar.

Publika.az xəbər verir ki, gizli səsvermə yolu ilə İşxan Saqatelyanın parlamentin vitse-spikeri vəzifəsindən kənarlaşdırılmasının lehinə 66 deputat səs verib, əleyhinə səs verən olmayıb.

Vahe Akopyanın parlamentin iqtisadi məsələlər üzrə daimi komissiyasının sədri vəzifəsindən kənarlaşdırılmasının lehinə də 66 səs verilib, əleyhinə heç kim çıxış etməyib.

İşxan Saqatelyan və Vahe Akopyanın tutduqları vəzifələrdən uzaqlaşdırılması üçün parlamentin növbədənkənar iclasının keçirilməsi təşəbbüsü ilə hakim “Mülki razılaşma” fraksiyasının deputatları çıxış edib. Onların sözlərinə görə, Saqatelyan parlamentin iclaslarında mütəmadi olaraq iştirak etmir, qarşıdurmalara səbəb olur, kobud ifadələr işlədir, ictimaiyyətin müxtəlif nümayəndələrini, deputatları təhqir edirdi. Akopyan isə VIII çağırış parlamentin birinci təqvim semestrinin ümumi 342 səsverməsindən 194-də, dəvət olunduğu 25 iclasın 20-də iştirak etməyib.

Qeyd edək ki, İşxan Saqatelyan və Vahe Akopyan hazırda Ermənistanda revanşist kəsimin əsas simalarından hesab olunur.

Səxavət