Türkiyə Zəfərin 100 illiyini Bayram edir

Bu gün qardaş Türkiyə Cümhuriyyətində Qurtuluş Savaşında qazanılan Zəfərin 100 illiyi böyük coşqu ilə Bayram edilir.

Böyük Qazi, Xilaskar Mustafa Kamal Atatürkün baş komandanlığı ilə Samsundan başlayan və 1922-ci il avqustun 30-da Dumlupınarda Zəfərlə bitən Qurtuluş Savaşı bötövlükdə Ümumtürk tarixinin şanlı səhifəsidir.

O zaman Birinci dünya müharibəsindən məğlub çıxmış Osmanlı dövlətinin koalisiyada birləşmiş düşmən ölkələr tərəfindən alçaldıcı Sevr müqaviləsi ilə parçalanmasının qarşısı məhz bu qələbə ilə alındı. Ali Baş Komandan Atarükün çağırışı ilə silaha sarılan türk oğulları 1919-1922-ci illərdə davam edən Qurtuluş Savaşının ən həlledici mərhələsində təkcə yadellilərə deyil, bütün dünyaya Türkün əzəmətini, qəhrəmanlığını nümayiş etdirdi.

Qurtuluş savaşından sonra bu tarixi qələbə ilk dəfə cümhuriyyətin elan edildiyi 1923-cü ildə qeyd edildi, 1926-cı ildən isə rəsmi olaraq Zəfər Bayramı kimi təvqimə salındı.

Bu gün, avqustun 30-u həm də Türkiyə Silahlı Qüvvələri Günü kimi əlamətdardır.

Əsrin yaşıdı olan Zəfərin Mübarək, TÜRKİYƏ!

Publika.az.