Azərbaycandan gətirilən taxılla bağlı ermənilərə çağırış edildi: Yeyə bilərsiniz

Ermənistan Qida Təhlükəsizliyi Müfəttişliyinin rəhbəri Tiqran Petrosyan bildirib ki, Azərbaycandan gətirilən Qazaxıstan taxılı insan istehlakı üçün yararlıdır.

Publika.az xəbər verir ki, Petrosyan bu barədə noyabrın 14-də keçirilən mətbuat konfransında deyib.

Onun sözlərinə görə, laboratoriya tədqiqatının ilkin nəticələri göstərir ki, taxıl dördüncü deyil, üçüncü kateqoriyaya aiddir.

"Hər şeyi yoxlamaq üçün müraciətlər aldıq - radiasiya, zəhərlənmə. Taxıl yaxşıdır. Rusiya taxılında 14,5, Qazaxıstan taxılında isə 13 protein var. O, 3-cü kateqoriyaya aiddir. Lifin səviyyəsi Rusiya taxılında 29,5, Qazaxıstan taxılında isə 27-dir”, - Petrosyan bildirib.

O izah edib ki, hazırkı QOST-a görə, 1-4-cü kateqoriyalı taxıl insanların istehlakı, 5-ci kateqoriya isə yem üçün nəzərdə tutulub, lakin bütün kateqoriyalı taxıllar qida üçün istifadə edilə bilər.

Müfəttişlik rəisi bir daha qeyd edib ki, Ermənistan Respublikasına gətirilən Qazaxıstan taxılını ərzaq məhsulları üçün istifadə etmək olar. “GOST-a görə, təhlükəsizlik tələblərinə cavab verərsə, uyğun sayılır. “Dünən araşdırmanın nəticələri dərc edilib və bu gün kateqoriyalar üzrə ikinci qiymətləndirmənin nəticələri açıqlanacaq”, - Petrosyan vurğulayıb.

Tural