Meymunçiçəyinin Azərbaycanda yayılmaması üçün... - Həkim

Yoluxucu xəstəliklərin qarşısını almaq üçün 100 faizlik üsul yoxdur. Amma profilaktika üçün transsərhəd keçid zonalarında nəzarət, eyni zamanda əhali arasında təbliğat gücləndirilməli, insanlar məlumatlı olmalıdır. Hər hansı narahatlıq yarananda dərhal həkimə müraciət edilməli, əgər yoluxma qeydə alınarsa, müəyyən xəstəxanalar və şöbələr buna hazır olmalıdır.

Publika.az xəbər verir ki, bu sözləri professor Adil Qeybulla meymunçiçəyinin ölkəmizə keçidinin qarşısının alınması yolları barədə danışarkən deyib.

Ekspert bildirib ki, qabaqlayıcı tədbirlərin görülməsi çox vacibdir:

“İlk işlər profilaktik istiqamətdə, sonrakı hazırlıqlar isə müalicə istiqamətində olmalıdır. Bundan başqa Ümumdünya Səhiyyə Təşkilatının tövsiyələrinə əməl edilməlidir. Əlbəttə ki, mərhələ-mərhələ bu tövsiyələr dəyişə, müəyyən dövrdə vaksinasiya da ortaya çıxa bilər. Amma bu gün dünyanın xəstəliklərə nəzarətlə bağlı profilaktika mərkəzləri bu işə ciddi nəzarət edir və infeksiyanın lokallaşdırılması üçün çalışırlar. Bütün hallarda biz ən pis ssenarini gözə almalıyıq ki, infeksiya aşkar edildiyi təqdirdə onun maksimum lokallaşdırılmasına nail olaq. Əgər xəstəlik geniş yayılarsa, gələcəkdə 42 yaşdan aşağı əhalinin vaksinasiya məsələsini nəzərdə tutmalıyıq. Bir sözlə, situasiyaya uyğun davranmalıyıq”.