İnfarkt riskini azaldan yay meyvəsi

Ləzzəti və sərinləşdirici xüsusiyyəti qarpızı yayın ən sevilən meyvələrindən birinə çevirib. Ancaq qarpız, sadəcə, sərinləmək üçün yeyilməməlidir. Bu meyvə sağlamlıq üçün olduqca faydalıdır.

Qarpız böyrəklərin işini asanlaşdırır. Bədəndən lazımsız natriumun atılması nəticəsində qan təzyiqi sabitləşir, ürək öz funksiyalarını daha rahat həyata keçirir. İnfarkt riski azalır.

Kalorisi az olmasına baxmayaraq, qarpız vitamin, mineral və elementlərlə zəngindir. Ehtiva etdiyi laykopen maddəsi sayəsində orqanizmi xərçəngdən qoruyur. Yüksək miqdarda lif ehtiva etdiyi üçün bağırsaqların işini asanlaşdırır. Qarpızın 95 faizi sudur. Ona görə də insanı kökəltmir. Toxluq hissi yaratdığı üçün pəhriz saxlayanlara tövsiyyə edilir.

Buna baxmayaraq, diyetoloqlar təhlükəli qarpız pəhrizi ilə bağlı xəbərdarlıq edirlər. Belə ki, bəzi insanlar bütün gün xörək əvəzinə pendir və qarpız yeyərək arıqlayacaqlarını zənn edirlər. Ancaq nəticədə bədən üçün lazımlı zülal və vitaminlərin hamısını ala bilmir və sağlamlıq problemləri yaranır.

Qeyd edək ki, qarpızı yeməkdən yarım saat öncə, ya da 1 saat sonra yemək lazımdır.

Ləman Sultan